ઓક્ટોબર મહિનાને વિશ્વભરમાં બ્રેસ્ટ કેન્સર અવેરનેસ મન્થ તરીકે ઉજવવામાં આવે છે, ત્યારે મહિલાઓમાં આ ગંભીર બીમારી અંગે જાગૃતિ ફેલાવવાના હેતુથી આણંદ કૃષિ યુનિવર્સિટીના સંકુલમાં એક ખાસ જાગૃતિ સેમિનારનું આયોજન કરવામાં આવ્યું હતું. આજકાલ બદલાતી જીવનશૈલી અને ખાણીપીણીની આદતો વચ્ચે મહિલાઓમાં સ્તન કેન્સરના કેસો ચિંતાજનક રીતે વધી રહ્યા છે, જેને ધ્યાનમાં રાખીને આ સેમિનારમાં આ રોગના લક્ષણો અને તેનાથી બચવાના ઉપાયો અંગે વિસ્તૃત ચર્ચા કરવામાં આવી હતી.
આ મહત્વપૂર્ણ સેમિનારમાં ઝાયડસ હોસ્પિટલના જાણીતા મેડિકલ અને હિમેટો ઓન્કોલોજિસ્ટ ડોક્ટર કેતન મકવાણા મુખ્ય વક્તા તરીકે ઉપસ્થિત રહ્યા હતા. તેમણે ઉપસ્થિત મહિલાઓને માર્ગદર્શન આપતા જણાવ્યું હતું કે આજના સમયમાં સ્તન કેન્સરનું પ્રમાણ વધી રહ્યું છે, પરંતુ જો યોગ્ય સમયે અને શરૂઆતના સ્ટેજમાં જ આ રોગનું નિદાન થઈ જાય તો તેને સંપૂર્ણપણે મટાડી શકાય છે. તેમણે મહિલાઓને ખાસ ભારપૂર્વક જણાવ્યું હતું કે સૌએ દર મહિને સ્વનિરીક્ષણ કરવું જોઈએ અને શરીરમાં કોઈપણ નાની ગાંઠ કે અસામાન્ય બદલાવ દેખાય તો જરાય શરમ કે ડર રાખ્યા વગર તરત જ ડોક્ટરનો સંપર્ક કરવો હિતાવહ છે.
આ પ્રેરણાદાયી કાર્યક્રમમાં આણંદ કૃષિ યુનિવર્સિટીના વિવિધ વિભાગોના મહિલા પ્રોફેસરો, વહીવટી મહિલા કર્મચારીઓ અને મોટી સંખ્યામાં યુવતીઓ તથા વિદ્યાર્થીનીઓ સહિત કુલ 400 થી વધુ મહિલાઓએ ઉત્સાહભેર હાજરી આપી હતી. સેમિનારના અંતે એક સવાલ-જવાબનું સત્ર પણ રાખવામાં આવ્યું હતું, જેમાં મહિલાઓએ કેન્સરના નિદાન, સારવાર અને તેનાથી જોડાયેલી પોતાના મનની તમામ શંકાઓ વિશે ડોક્ટર સાથે ખુલીને પ્રશ્નોત્તરી કરી હતી અને મૂલ્યવાન માર્ગદર્શન મેળવ્યું હતું.
