મહારાષ્ટ્રના રાયગઢ જિલ્લાના સૈહ્યાદ્રી-વેસ્ટર્ન ઘાટ વિસ્તારમાં આવેલા કરજતમાં એક મોટા એનર્જી પ્રોજેક્ટ માટે હજારો વૃક્ષો કાપવામાં આવતા રાજ્યમાં જોરદાર રાજકીય ઘમાસાણ મચી ગયું છે. વીકેન્ડ દરમિયાન ટોર્રેન્ટ પાવર દ્વારા શરૂ કરાયેલા 3,000 મેગાવોટના પંપ સ્ટોરેજ પ્રોજેક્ટ માટે વૃક્ષોની કતલ કરવામાં આવી હોવાના વિડિયો અને તસવીરો સોશિયલ મીડિયા પર વાયરલ થતાં જ સ્થાનિક લોકો અને એક્ટિવિસ્ટો રસ્તા પર ઉતરી આવ્યા છે. આ પ્રોજેક્ટના સમર્થનમાં સરકાર દાવો કરી રહી છે કે રાજ્યની ઊર્જા જરૂરિયાતો માટે આ પ્રોજેક્ટ અત્યંત જરૂરી છે, તો બીજી તરફ વિપક્ષી નેતાઓ આ કંપનીના ગુજરાત સાથેના કનેક્શનને લઈને સત્તાધીશો પર મહારાષ્ટ્રના હિતોની અવગણના કરવાનો ગંભીર આક્ષેપ કરી રહ્યા છે.
આ વિવાદાસ્પદ પ્રોજેક્ટ હેઠળ કુલ 32,490 વૃક્ષોમાંથી અત્યાર સુધીમાં અંદાજે 1,800 વૃક્ષો કાપી નાખવામાં આવ્યા છે, જેને લઈને પર્યાવરણ પ્રેમીઓમાં ભારે રોષ જોવા મળી રહ્યો છે. શિવસેના (UBT) નેતા આદિત્ય ઠાકરે પોતાની પાર્ટીના કાર્યકર્તાઓ સાથે તાત્કાલિક કરજત દોડી ગયા હતા અને સ્થાનિકો સાથે મુલાકાત કરી હતી. તેમણે સવાલ ઉઠાવ્યો હતો કે આપણે વિકાસના વિરોધી નથી, પરંતુ સસ્ટેનેબલ વિકાસ જરૂરી છે અને કોઈ ચોક્કસ કંપનીને આટલું બધું પ્રોટેક્શન કેમ આપવામાં આવી રહ્યું છે? આ સાથે જ પ્રખ્યાત અભિનેતા અને પર્યાવરણવિદ સયાજી શિંદેએ પણ આક્રમક અંદાજમાં પૂછ્યું હતું કે શું સરકાર મહારાષ્ટ્રને રણપ્રદેશ બનાવવા માંગે છે? રાજ્યનું ફોરેસ્ટ કવર પહેલેથી જ 70 ટકાથી ઘટીને માત્ર 35 ટકા જ રહી ગયું છે, ત્યારે ઇકો-સેન્સિટિવ ઝોનમાં આવા પ્રોજેક્ટ્સથી વન્યજીવો અને કુદરતી વાતાવરણને ભારે નુકસાન થશે. જોકે, સરકાર દ્વારા અન્યત્ર 90,000 નવા છોડ વાવવાનું વચન આપવામાં આવ્યું છે, જેનો વિરોધીઓ વિરોધ કરી રહ્યા છે.
આ મામલે રાજકીય ગરમાવો વધતા ડેપ્યુટી સીએમ દેવદણ ફડણવીસે બચાવ કરતા સ્પષ્ટતા કરી છે કે આ પ્રોજેક્ટ તમામ નિયમોનું પાલન કરીને જ મંજૂર કરવામાં આવ્યો છે અને મહિનાઓ સુધી પબ્લિક હિયરિંગ થયા બાદ જ ગ્રીન સિગ્નલ અપાયું છે. બીજી તરફ ભાજપે આકરા પ્રહાર કરતા જણાવ્યું છે કે બેરોજગાર રાજકારણીઓ રાજ્યના વિકાસમાં અડચણો ઊભી કરી રહ્યા છે. દરમિયાન ટોર્રેન્ટ પાવર તરફથી નિવેદન બહાર પાડવામાં આવ્યું છે કે આ પ્રોજેક્ટ ભીમાશંકર વાઇલ્ડલાઇફ સેન્ચ્યુરીની અંદર નથી અને તે સામાન્ય હાઇડ્રોપાવર પ્રોજેક્ટ કરતા 52 ગણી ઓછી જગ્યા રોકે છે. આ પ્રોજેક્ટ દ્વારા વાર્ષિક 6,570 મિલિયન યુનિટ વીજળી ઉત્પન્ન થશે અને પીક અવર્સમાં રાજ્યની પાવર જરૂરિયાત પૂરી થશે. કંપનીના દાવા મુજબ પર્યાવરણ અને ફોરેસ્ટ ડિપાર્ટમેન્ટની તમામ કડક તપાસ, એક્સપર્ટ કમિટીના રિપોર્ટ અને સાઇટ ઇન્સ્પેક્શન બાદ જ આ પ્રોજેક્ટને મંજૂરી મળી છે.
