વડોદરા જિલ્લામાંથી પોલીસની કડક કાર્યવાહીના સમાચાર સામે આવ્યા છે, જ્યાં વડોદરા ગ્રામ્ય લોકલ ક્રાઈમ બ્રાન્ચ એટલે કે LCB ની ટીમે ચોક્કસ બાતમીના આધારે શિનોર તાલુકાના સુરાશામળ ગામની સીમમાં અચાનક દરોડો પાડ્યો હતો. ગામના તળાવડી વિસ્તાર પાસે આવેલા આંબાના ઝાડ નીચે ખુલ્લામાં ધમધમતા આ જુગારધામ પર પોલીસની અચાનક રેડ પડતા સ્થાનિક સ્તરે બૂટલેગરો અને જુગારીઓમાં ભારે ફફડાટ વ્યાપી ગયો હતો. પોલીસની આ યુક્તિથી પત્તાં-પાનાં રમી રહેલા શખ્સો રંગેહાથ ઝડપાઈ ગયા હતા.
પોલીસના આ સફળ ઓપરેશન દરમિયાન સ્થળ પરથી પૈસાની હારજીતનો જુગાર રમી રહેલા કુલ 5 ઈસમોને ઝડપી લેવામાં આવ્યા હતા. પોલીસે પકડાયેલા આ તમામ શખ્સો પાસેથી અંગઝડતીના રોકડા રૂ. 62,500 તથા દાવ પર લાગેલા રૂ. 16,150 મળીને કુલ રૂ. 78,650 નો મુદ્દામાલ જપ્ત કર્યો છે. આટલી મોટી રકમ સાથે જુગારીઓ પકડાતા પોલીસની કામગીરી શરૂઆતમાં પ્રશંસનીય લાગી રહી હતી, પરંતુ ત્યારબાદ આ કેસના અન્ય પાસાંઓને લઈને અનેક સવાલો ઊભા થયા છે.
આ કાર્યવાહી બાદ સ્થાનિક સ્તરે અનેક પ્રકારની ચર્ચાઓ શરૂ થઈ ગઈ છે કે શું આ કેસમાં માત્ર આ 5 જ ઈસમો હાજર હતા, કે પછી આ જુગારધામ પાછળ સંકળાયેલા અસલી 'મોટા માથાઓ' પોલીસની પકડમાંથી ભાગી છૂટ્યા છે કે પછી તેમને જાણી જોઈને બચાવાયા છે? માત્ર નાના ખેલાડીઓ જ પકડાઈ જવાથી અને મુખ્ય સંચાલકો સામે ન આવવાથી પોલીસની કામગીરી સામે શંકાની સોય તાણવામાં આવી રહી છે. આ મામલામાં સંડોવાયેલા અન્ય શખ્સોની ભૂમિકા અંગે ઊંડાણપૂર્વક તપાસ કરવામાં આવે તેવી લોક માગ હવે પ્રબળ બની રહી છે.
