વૉલ સ્ટ્રીટ પર અત્યારે અર્નિંગ્સ સિઝન ચાલી રહી છે અને એસએન્ડપી 500 ઇન્ડેક્સની કંપનીઓ જોરદાર નફો કમાઈ રહી હોવાના અહેવાલો છે. સામાન્ય રીતે એવું માનવામાં આવે છે કે આ કમાણી કંપનીઓની બહોળી વૃદ્ધિ દર્શાવે છે, પરંતુ વાસ્તવિકતા કંઈક અલગ જ છે. રાષ્ટ્રપતિ ડૉનાલ્ડ ટ્રમ્પના ઈરાન સાથેના સંઘર્ષના કારણે ઊર્જા અને ડિફેન્સ સેક્ટરને અણધાર્યો ફાયદો થયો છે, જેને પાયરિક બૂમ એટલે કે મોંઘી કિંમતે મળેલી અસ્થાયી જીત કહી શકાય. આ તેજી એવી છે જેની ભારે કિંમત ભવિષ્યમાં સામાન્ય જનતા અને અર્થતંત્રએ ચૂકવવી પડશે.
આગામી ત્રીજા ક્વાર્ટરમાં એનર્જી ઇન્ડસ્ટ્રીનો નેટ ઇન્કમ અગાઉના વર્ષ કરતાં આશરે 135% વધી શકે છે, જ્યારે એરોસ્પેસ અને ડિફેન્સ સેક્ટરનો નફો પણ આશરે 50% સુધી ઉછળવાની સંભાવના છે. આ ઉપરાંત પેટ્રોલિયમ કેમિકલ્સ, ફર્ટિલાઇઝર્સ અને મેટલ્સ જેવા મટીરિયલ્સ સેક્ટરમાં પણ 39%નો ઉછાળો અપેક્ષિત છે. જો આ યુદ્ધ પ્રેરિત સેક્ટર્સને બાદ કરીએ તો એઆઈ સિવાયના બાકીના એસએન્ડપી 500 સેક્ટર્સની કમાણી માંડ 4.5% વધી છે, જે 3.7%ના ફુગાવાના દર સામે માંડ ટકી રહી છે. યુદ્ધ આધારિત આ નફો એક પ્રકારે પરજીવી સમાન છે કારણ કે તેના કારણે ફ્યુઅલના ભાવ અને લોન પરના વ્યાજ દરો વધે છે, જે ગ્રાહકોની ખરીદશક્તિને સીધી અસર કરે છે.
ઇતિહાસ સાક્ષી છે કે એનર્જી શૉક્સની નુકસાનકારક અસરો અર્થતંત્ર પર થોડા સમય પછી દેખાતી હોય છે અને આ વખતે પણ હાઉસિંગ તેમજ ઓટોમોબાઈલ જેવા વ્યાજ સંવેદનશીલ સેક્ટર્સ દબાણમાં આવી રહ્યા છે. નેશનલ એસોસિએશન ઓફ હોમ બિલ્ડર્સનો હાઉસિંગ માર્કેટ ઇન્ડેક્સ જૂન 2012 પછીના સૌથી નીચલા સ્તરે પહોંચી ગયો છે. બીજી બાજુ આઈટી સેક્ટરમાં એઆઈ બૂમ મર્જી મુજબ 67% સુધીનો ગ્રોથ આપી રહી છે અને વર્ષ 2022ના અંતથી અત્યાર સુધીમાં પારિવારિક સંપત્તિમાં આશરે 52 ટ્રિલિયન ડૉલરનો વધારો થયો છે. તેમ છતાં, કેન ગ્રીફિન અને રે ડાલિયો જેવા દિગ્ગજ અબજોપતિઓએ એઆઈ સેક્ટરમાં બબલ હોવાની ચેતવણી આપી છે. જો આ બબલ ફૂટશે અને યુદ્ધ આધારિત નફો ઓછો થશે, તો માર્કેટને બચાવવા માટે બહુ ઓછી કુશન કે બેકઅપ બચશે.
