સિનેમા જગતમાં મહિલાઓની ભાગીદારી વધારવા અને તેમને આર્થિક રીતે મજબૂત કરવાના હેતુથી ન્યૂ યોર્ક સિટીમાં એક ખાસ મેન્ટરશિપ પ્રોગ્રામનું આયોજન કરવામાં આવ્યું હતું. સપ્ટેમ્બર 2026 માં યોજાયેલા આ ત્રણ દિવસીય પ્રોગ્રામમાં ઓસ્કાર વિજેતા એક્ટર હોલી બેરી સહિત ફિલ્મ ઇન્ડસ્ટ્રીના જાણીતા ચહેરાઓએ જજ તરીકે ભૂમિકા ભજવી હતી. ટ્રિબેકા એન્ટરપ્રાઇઝિસ અને શાનેલ દ્વારા સંયુક્ત રીતે આયોજિત થતો આ 'Through Her Lens' પ્રોગ્રામનું આ 11 મું વર્ષ હતું, જેનો મુખ્ય ઉદ્દેશ્ય ઉભરતી મહિલા અને નોન-બાઈનરી ફિલ્મમેકર્સને પ્રોજેક્ટ પૂરા કરવામાં મદદ કરવાનો છે.
આ પ્રોગ્રામના અંતે હાઈ-પ્રોફાઈલ જ્યુરી પેનલે પાંચ ફાઇનલિસ્ટ પ્રોજેક્ટ્સનું મૂલ્યાંકન કર્યું હતું, જેમાં હોલી બેરી સાથે એક્ટર મેગ રાયણ, રેજિના કિંગ, એલા રૂબિન અને સિનેમેટોગ્રાફર ઓટમ ડુરાલ્ડ આર્કાપાવ પણ સામેલ હતા. રાઇટર-ડાયરેક્ટર જેમ લિટલ અને પ્રોડ્યુસર કેસેનિયા યોર્શની શોર્ટ ફિલ્મ COWARDS ને વિજેતા જાહેર કરવામાં આવી હતી, જેને ફિલ્મ બનાવવા માટે 120000 ડોલરનું અનુદાન અને ટ્રિબેકા સ્ટુડિયોઝ તરફથી સપોર્ટ મળ્યો છે. આ વિજેતા ફિલ્મ શિકાગોમાં એક 11 વર્ષની છોકરી અને તેના પરિવારની વાતો પર આધારિત છે. આ ઉપરાંત, અન્ય 4 ફાઇનલિસ્ટ ટીમોને પણ તેમના પ્રોજેક્ટ્સ વિકસાવવા માટે પ્રત્યેકને 10000 ડોલરનું અનુદાન આપવામાં આવ્યું છે.
આ પ્રોગ્રામ દ્વારા યુવા કલાકારોને સ્ક્રિપ્ટ ડેવલપમેન્ટ, ડાયરેક્ટિંગ અને પ્રોડક્શન પ્લાનિંગ જેવા વિષયો પર દિગ્ગજ મેન્ટર્સનું માર્ગદર્શન મળે છે. વિજેતા ટીમને માત્ર શૂટિંગ દરમિયાન જ નહીં, પરંતુ ફિલ્મ બન્યા પછી ડિસ્ટ્રિબ્યુશન સુધી સતત સપોર્ટ મળતો રહે છે. ઇન્ડિપેન્ડન્ટ સ્ટોરીટેલિંગને પ્રોત્સાહન આપતા આ સફળ આયોજન બાદ આયોજકોએ જાહેરાત કરી છે કે 2027 ના ટ્રિબેકા ફેસ્ટિવલ પહેલા આગામી એડિશન માટેની અરજીઓ ફરીથી ખોલવામાં આવશે, જે ફેસ્ટિવલ ન્યૂ યોર્કમાં 3 જૂનથી 12 જૂન દરમિયાન યોજાવાનો છે.
