અમેરિકામાં ચૂંટણીનો માહોલ જેમ-જેમ નજીક આવી રહ્યો છે, તેમ-તેમ નેતાઓના નિવેદનો પણ વધુ આક્રમક બનતા જાય છે. આ જ ક્રમમાં પૂર્વ પ્રેસિડેન્ટ ડોનાલ્ડ ટ્રમ્પે ડેમોક્રેટ્સ પર શાબ્દિક હુમલો કરતા એક અત્યંત ચોંકાવનારી ચેતવણી આપી દીધી છે. ટ્રમ્પે ખુલ્લેઆમ કહ્યું છે કે જો ડેમોક્રેટ્સની નીતિઓ સફળ થઈ, તો તે અમેરિકાના દરવાજા જીહાદીઓના ટોળા માટે ખોલી નાખશે, જેનાથી દેશમાં હિંસા અને ટેરરનો નવો ખતરો પેદા થશે.
ટ્રમ્પે પોતાના અંદાજમાં એવું પણ કહી દીધું કે આ જોખમ એટલું બધું વધી જશે કે કદાચ ભવિષ્યમાં અમેરિકનો શાંતિથી ક્રિસમસનો તહેવાર પણ નહીં મનાવી શકે. તેમની આ વાત સાંભળીને ત્યાંના સત્તાવાર વર્તુળો અને આમ જનતામાં પણ ચર્ચા શરૂ થઈ ગઈ છે કે શું ખરેખર દેશની સુરક્ષા સામે આવો મોટો પડકાર ઊભો થઈ શકે છે? ટ્રમ્પે યાદ અપાવ્યું કે અમેરિકાએ ભૂતકાળમાં કમ્યુનિઝમ અને ટેરરિઝમ સામે લાંબી લડાઈઓ લડી છે અને લોકોએ બલિદાનો આપ્યા છે.
પોતાના ભાષણમાં ટ્રમ્પે સવાલ ઉઠાવ્યો કે શું દેશના લોકોએ એટલા માટે યુદ્ધો લડ્યા હતા કે આજે પોતાના જ દેશની સુરક્ષા અને મૂલ્યો જોખમમાં મુકાઈ જાય? ટ્રમ્પના આ આક્રમક નિવેદન બાદ સોશિયલ મીડિયા પર વિડિયો પણ ખૂબ વાયરલ થઈ રહ્યો છે અને લોકો આ મુદ્દે પોતપોતાના મંતવ્યો આપી રહ્યા છે. અમેરિકન રાજકારણમાં આ નિવેદન આગામી દિવસોમાં કેટલો મોટો રંગ લાવશે તે તો સમય જ કહેશે, પણ હાલ તો આ મુદ્દો ચર્ચાના કેન્દ્રમાં છે.
