આગામી દિવસોમાં દેશના વડાપ્રધાન નરેન્દ્ર મોદી ગુજરાતના મહેમાન બનવાના છે, જેને લઈને અત્યારથી જ પાટનગર ગાંધીનગરથી લઈને બનાસકાંઠા અને નર્મદા સુધી વહીવટી તંત્રમાં ભારે દોડધામ અને ઉત્સાહ જોવા મળી રહ્યો છે. પીએમ મોદી આગામી 30 અને 31 ઓક્ટોબર એમ બે દિવસ માટે ગુજરાતના પ્રવાસે આવી રહ્યા છે. તેમના આ પ્રવાસને અત્યંત મહત્વનો અને સંવેદનશીલ ગણીને રાજ્ય સરકાર દ્વારા સુરક્ષા અને વ્યવસ્થાના તમામ પાસાઓ પર અત્યારથી જ બારીકાઈથી નજર રાખવામાં આવી રહી છે. કોઈ પણ પ્રકારની ચૂક ન રહી જાય તે માટે ગાંધીનગરના સ્વર્ણિમ સંકુલ ખાતે એક મહત્વપૂર્ણ અને ઉચ્ચસ્તરીય બેઠકનું આયોજન કરવામાં આવ્યું હતું.
આ બેઠકની વિશેષતા એ રહી કે ગાંધીનગર ખાતે બેઠા-બેઠા જ વીડિયો કોન્ફરન્સિંગના માધ્યમથી સંબંધિત જિલ્લાઓના વહીવટી તંત્ર અને પોલીસ પ્રશાસન સાથે સીધો સંવાદ સાધવામાં આવ્યો હતો. આ બેઠક નાયબ મુખ્યમંત્રી હર્ષ સંઘવીની અધ્યક્ષતામાં મળી હતી, જેમાં કૃષિ મંત્રી જીતુ વાઘાણી અને જળસંપત્તિ તથા પાણી પુરવઠા મંત્રી કુંવરજી બાવળીયા પણ વિશેષરૂપે ઉપસ્થિત રહ્યા હતા. આ ઉપરાંત રાજ્યના પોલીસ વડા યાની કે DGP, ગૃહ વિભાગના ઉચ્ચ સચિવો તેમજ અન્ય સંબંધિત વિભાગોના મોટા અધિકારીઓ પણ હાજર રહીને સુરક્ષાના પ્લાન પર મંથન કર્યું હતું. બેઠકમાં વીવીઆઈપી પ્રોટોકોલ, ટ્રાફિક મેનેજમેન્ટ, સ્થળ સુરક્ષા અને સામાન્ય જનતાને હાલાકી ન પડે તે માટે ખાસ માર્ગદર્શન આપવામાં આવ્યું હતું.
મળતી માહિતી મુજબ, પીએમ મોદી પોતાના આ પ્રવાસ દરમિયાન 30 ઓક્ટોબરે ઉત્તર ગુજરાતના સરહદી જિલ્લા બનાસકાંઠા ખાતે જઈ શકે છે, જ્યાં તેઓ વિવિધ વિકાસલક્ષી પ્રોજેક્ટ્સનું લોકાર્પણ અને ખાતમુહૂર્ત કરવા ઉપરાંત એક વિશાળ જનસભાને પણ સંબોધિત કરે તેવી પૂરી સંભાવના છે. જ્યારે પ્રવાસના બીજા દિવસે એટલે કે 31 ઓક્ટોબરે અખંડ ભારતના શિલ્પી સરદાર વલ્લભભાઈ પટેલની જન્મજયંતિ છે, જેને દેશભરમાં રાષ્ટ્રીય એકતા દિવસ તરીકે ઉજવવામાં આવે છે. આ ખાસ અવસરે પીએમ મોદી કેવડિયા-એકતાનગર ખાતે ઉપસ્થિત રહીને સ્ટેચ્યૂ ઓફ યુનિટી પર સરદાર સાહેબને શ્રદ્ધાંજલિ અર્પણ કરશે અને દેશભરના સુરક્ષા દળો તેમજ કેડેટ્સ દ્વારા યોજાનાર શાનદાર રાષ્ટ્રીય એકતા પરેડની સલામી ઝીલશે. આ તમામ આયોજનોને સફળ બનાવવા માટે તમામ વિભાગોને પરસ્પર સંકલનમાં રહીને કામ કરવા સ્પષ્ટ સૂચનાઓ આપી દેવામાં આવી છે.
