દેશમાં હવામાને અચાનક જ યુ ટર્ન લીધો છે, જેના કારણે એક જ સમયે બે વિપરીત પરિસ્થિતિઓ જોવા મળી રહી છે. એક તરફ બંગાળની ખાડીમાં સર્જાયેલું ઊંડું દબાણ હવે તીવ્ર વાવાઝોડા 'અર્નબ'માં ફેરવાઈ ગયું છે, તો બીજી તરફ ઉત્તર ભારતના પહાડી વિસ્તારોમાં સિઝનની પહેલી હિમવર્ષા શરૂ થઈ ગઈ છે. આઈએમડીના જણાવ્યા અનુસાર, 'અર્નબ' વાવાઝોડું ઉત્તર-ઉત્તરપશ્ચિમ તરફ આગળ વધી રહ્યું છે, જેને લઈને તટીય વિસ્તારોમાં ભારે તલગાડા મચ્યો છે. ઓડિશા, આંધ્ર પ્રદેશ અને પશ્ચિમ બંગાળના કિનારે 60 થી 80 કિલોમીટર પ્રતિ કલાકની ઝડપે તોફાની પવનો ફૂંકાઈ રહ્યા છે અને દરિયો તોફાની બન્યો છે.
આ વાવાઝોડાની ગંભીરતાને જોતાં દેશના કુલ 14 રાજ્યોમાં ભારેથી અતિભારે વરસાદનું એલર્ટ અપાયું છે. તામિલનાડુ, કેરળ, પુડુચેરી, આંધ્ર પ્રદેશ અને કર્ણાટકમાં રેડ એલર્ટ જારી કરવામાં આવ્યું છે, જ્યારે ઓડિશા, તેલંગાણા, પશ્ચિમ બંગાળ અને છત્તીસગઢમાં ઓરેન્જ એલર્ટ આપવામાં આવ્યું છે. આ ઉપરાંત ઝારખંડ, બિહાર અને દિલ્હીના કેટલાક વિસ્તારોમાં પણ આગામી 26 થી 29 ઓક્ટોબર દરમિયાન વાદળછાયું વાતાવરણ અને હળવાથી મધ્યમ વરસાદની પૂરી સંભાવના છે. સંભવિત ખતરાને ધ્યાનમાં રાખીને તંત્ર દ્વારા એનડીઆરએફ અને એસડીઆરએફની ટીમોને સ્ટેન્ડબાય રખાઈ છે તેમજ માછીમારોને આગામી દિવસોમાં દરિયો ન ખેડવાની કડક સૂચનાઓ અપાઈ છે.
બીજી બાજુ, દેશના પહાડી વિસ્તારોમાં હવામાનનો મિજાજ એકદમ બદલાઈ ગયો છે. હિમાલયના જમ્મુ-કાશ્મીર, હિમાચલ પ્રદેશ અને ઉત્તરાખંડના ઊંચા પહાડી વિસ્તારોમાં સક્રિય થયેલા વેસ્ટર્ન ડિસ્ટર્બન્સના કારણે જબરદસ્ત બરફવર્ષા શરૂ થઈ ચૂકી છે. ઉત્તરાખંડના કેટલાક ઊંચા વિસ્તારોમાં તો તાપમાનનો પારો ગગડીને શૂન્યની નજીક પહોંચી ગયો છે. પહાડો પરથી ફૂંકાઈ રહેલા આ બર્ફીલા અને ઠંડા પવનોની સીધી અસર મેદાની વિસ્તારો પર પડી છે. દિલ્હી-એનસીઆર સહિત ઉત્તર પ્રદેશ, બિહાર, રાજસ્થાન અને મધ્ય પ્રદેશમાં સવાર અને સાંજના સમયે ગુલાબી ઠંડીનો અહેસાસ થવા લાગ્યો છે, જે આગામી દિવસોમાં વધુ જોર પકડશે તેવી વકી છે.
