આજના ફાસ્ટ ફૂડ અને દોડધામ ભરેલા યુગમાં માનવી પોતાના સ્વાસ્થ્ય પ્રત્યે બેધ્યાન બન્યો છે, જેના કારણે અનેક લોકો રોગોનો ભોગ બનીને દવાના સહારે જીવવા મજબૂર બન્યા છે. જોકે, સ્વાસ્થ્ય માટે ઉત્તમ ગણાતી શિયાળાની ઋતુમાં દાહોદવાસીઓમાં તંદુરસ્તી પ્રત્યેનો ઉત્સાહ સ્પષ્ટ જોવા મળી રહ્યો છે. વહેલી સવારે મોર્નિંગ વોક, રનિંગ અને સાયકલિંગ કરતા શહેરીજનોની ભીડથી રસ્તાઓ ધમધમે છે, જે દર્શાવે છે કે લોકો હવે પોતાના ફિઝિકલ વેલનેસને લઈને વધુ સભાન બન્યા છે.
આ બદલાતા સમય સાથે ફિટનેસ મેળવવાની રીતોમાં પણ આમૂલ પરિવર્તન આવ્યું છે. વર્ષો પહેલા દાહોદ શહેરમાં બારેમાસ ધમધમતા દેશી અખાડાઓમાં યુવાનો દંડ બેઠક અને કુસ્તી દ્વારા કસરત કરતા હતા, જે આજે સંપૂર્ણપણે લુપ્ત થઈ ગયા છે. અખાડાનું સ્થાન હવે આધુનિક અને મોંઘા જીમ્નેશિયમે લઈ લીધું છે. શહેરમાં જીમની સંખ્યા સતત વધી રહી છે અને તેમાં ઉપલબ્ધ અત્યાધુનિક સાધનો તેમજ પ્રોફેશનલ ટ્રેનર્સ આકર્ષણનું કેન્દ્ર બન્યા છે.
આધુનિક ફિટનેસ કલ્ચરમાં યુવાનો 'સિક્સ પેક્સ' એબ્સ બનાવવા અને યુવતીઓ પોતાનું ફિગર મેન્ટેન રાખવા માટે હજારો રૂપિયાનો ખર્ચ કરવા તૈયાર છે. જીમ કલ્ચરની આ દોડમાં માત્ર કસરત જ નહીં, પરંતુ ડાયેટ પ્લાન અને પ્રોટીન સપ્લીમેન્ટ્સ પણ જીવનશૈલીનો એક મહત્વપૂર્ણ ભાગ બની ગયા છે. પરંપરાગત કસરતો પાછળનું દેશી આકર્ષણ ઓસર્યું છે, પરંતુ તંદુરસ્ત રહેવાની ઘેલછા દાહોદના યુવા વર્ગમાં પહેલા કરતાં વધુ તીવ્ર બની છે.
