તમિલનાડુ પાવર ડિસ્ટ્રિબ્યુશન કોર્પોરેશન લિમિટેડ (TNPDCL) દ્વારા વર્ષ ૨૦૨૫-૨૬ માટે ૪,૦૬૦ કરોડ રૂપિયાનો જંગી ચોખ્ખો નફો જાહેર કરવામાં આવ્યો હતો, જે અગાઉના વર્ષની સરખામણીમાં લગભગ બમણો હતો. પાવર ખરીદીના ખર્ચમાં ૩,૬૧২ કરોડ રૂપિયાનો ઘટાડો થવાને કારણે કંપનીની નાણાકીય સ્થિતિમાં સુધારો જોવા મળ્યો હતો. જો કે, વાર્ષિક અહેવાલમાં સ્ટેચ્યુટરી ઓડિટર્સે કંપનીના હિસાબોમાં ભારે વિસંગતતાઓ અને ક્ષતિઓ શોધી કાઢતા આ ખુશી ટૂંકી સાબિત થઈ છે. ઓડિટ ઓબ્ઝર્વેશન મુજબ, જો આ તમામ નાણાકીય અનિયમિતતાઓ અને જોગવાઈઓના અભાવને સુધારવામાં આવે તો કંપનીના નફામાં સીધો ૩,૭૪૪.૩૯ કરોડ રૂપિયાનો જંગી ઘટાડો થઈ શકે છે.
ઓડિટ અહેવાલમાં સામે આવ્યું છે કે કંપનીએ જૂની અને નકામી થઈ ગયેલી ઇન્વેન્ટરી તેમજ શંકાસ્પદ ગ્રાહક લેણાં સામે કોઈ જ જોગવાઈ કરી નથી. આ ઉપરાંત કાયમી ધોરણે ડિસકનેક્ટ થયેલા ગ્રાહકોના બાકી ૧૯૨.૯૩ કરોડ, વિવાદોમાં ફવાયેલા હાઇ-ટેન્શન ગ્રાહકોના ૨૨૧.૧૫ કરોડ અને ઇ-ટેક્સ સંબંધી ૪૭૪.૭૫ કરોડ રૂપિયાના ડેબિટ્સ સામે પણ આંખ આડા કાન કરવામાં આવ્યા છે. ઓવરહેડ પાવર લાઈનોને અંડરગ્રાઉન્ડ કેબલમાં બદલવાની બંધ કરાયેલી યોજના માટે અગાઉ 'એસેટ્સ અંડર કન્સ્ટ્રક્શન' તરીકે નોંધાયેલા ૭૭૦.૬૧ કરોડ રૂપિયાને ઇમ્પેયરમેન્ટ લોસ તરીકે સ્વીકારવા ઓડિટર્સે તાકીદ કરી છે. આ ઉપરાંત ડુપ્લિકેટ રેવેન્યુ એન્ટ્રીઓ અને ખર્ચ-આવકના ખોટા વર્ગીકરણના મુદ્દાઓ પણ સપાટી પર આવ્યા છે.
ટીએનઈબીના પૂર્વ અધિકારી એસ. નીલકંઠ પિલાઈના જણાવ્યા અનુસાર, કેગ (CAG) ના ઓડિટ રિપોર્ટમાં પાવર ખરીદી સંદર્ભે પણ અનેક ગંભીર વિસંગતતાઓ નોંધી છે. એક-એક કરોડથી વધુ રકમ વાળા ૨,૦૦૦ જેટલા પાવર પરચેઝ વાઉચર્સની ક્યારેય સમીક્ષા જ કરવામાં આવી ન હતી અને વારંવાર યાદ અપાવવા છતાં ૩૫૩.૮૧ કરોડના વાઉચર્સ ઓડિટ માટે ઉપલબ્ધ કરાવવામાં આવ્યા ન હતા. બીજી તરફ, કંપનીના વરિષ્ઠ અધિકારીઓનું કહેવું છે કે તેઓ ઓડિટર્સ સાથે મળીને જરૂરી દસ્તાવેજો રજૂ કરી રહ્યા છે અને નફામાં કોઈ ધરખમ ઘટાડો નહીં થાય તે માટે સુધારાત્મક પગલાં લેવામાં આવી રહ્યા છે.
