શરીરમાં યુરિક એસિડનું પ્રમાણ વધવું એ આજકાલ સામાન્ય સ્વાસ્થ્ય સમસ્યા બની ગઈ છે, જેને માત્ર ખાન-પાન પૂરતી મર્યાદિત ન ગણવી જોઈએ. જ્યારે શરીરમાં પ્યુરિન નામનું તત્વ તૂટે છે ત્યારે યુરિક એસિડ ઉત્પન્ન થાય છે, જે કુદરતી રીતે પણ બને છે અને કેટલાક આહારમાં પણ હાજર હોય છે. જ્યારે કિડની આ વધારાના યુરિક એસિડને યોગ્ય રીતે બહાર નથી કાઢી શકતી, ત્યારે તેનું સ્તર વધવા લાગે છે. લાંબા સમય સુધી આ સ્થિતિ રહેવાથી સાંધામાં યુરિક એસિડના સ્ફટિકો જમા થઈ જાય છે, જેના પરિણામે ગાઉટ અને સાંધામાં તીવ્ર દુખાવો તથા સોજાની સમસ્યા ઉત્પન્ન થાય છે. આ સમસ્યાથી બચવા માટે આહારમાં કેટલાક જરૂરી બદલાવો કરવા અત્યંત આવશ્યક બની જાય છે.
યુરિક એસિડને નિયંત્રિત રાખવા માટે રેડ મીટ, ઓર્ગન મીટ, કેટલાક સીફૂડ, દારૂ, બિયર અને ગળ્યા પીણાં તેમજ પેકેજ્ડ જ્યુસથી અંતર રાખવું ખૂબ જ જરૂરી છે. આના બદલે દરરોજ પૂરતા પ્રમાણમાં પાણી પીવું, ઓછા ફેટવાળું દૂધ અને દહીં લેવા તેમજ મોસમી ફળો, શાકભાજી અને આખા અનાજનો આહારમાં સમાવેશ કરવો ફાયદાકારક સાબિત થાય છે. વજનને ધીમે-ધીમે નિયંત્રિત રાખવું પણ એટલું જ મહત્વપૂર્ણ છે, કારણ કે ખૂબ ઝડપથી વજન ઘટાડવું કે લાંબા સમય સુધી ભૂખ્યા રહેવાથી પણ યુરિક એસિડનું સ્તર વધી શકે છે. ઘણીવાર લોકો યુરિક એસિડને કાબૂમાં લાવવા માટે લસણનું સેવન કરતા હોય છે, પરંતુ આ બાબતે વૈજ્ઞાનિક તથ્યોને જાણવા ખૂબ જરૂરી છે.
લસણમાં એન્ટીઓક્સીડેન્ટ અને એન્ટી-ઇન્ફ્લેમેટરી ગુણો ભરપૂર માત્રામાં જોવા મળે છે, જે સ્વાસ્થ્ય માટે સારા છે. જોકે, તબીબોના મતે હજુ સુધી એવા કોઈ પૂરતા વૈજ્ઞાનિક પુરાવા ઉપલબ્ધ નથી જે સાબિત કરે કે લસણ ખાવાથી યુરિક એસિડનું સ્તર સીધું જ ઘટી જાય છે. તેથી લસણને સ્વસ્થ આહારનો એક હિસ્સો જરૂર બનાવી શકાય, પરંતુ તેને યુરિક એસિડ ઘટાડવાના એકમાત્ર ઉપચાર તરીકે ન જોવું જોઈએ. જો વારંવાર સાંધામાં દુખાવો કે સોજાના લક્ષણો દેખાય, તો માત્ર ડાયેટ બદલવાને બદલે રુમેટોલોજિસ્ટની સલાહ લેવી અને જરૂર પડ્યે દવાઓ દ્વારા તેની સારવાર કરાવવી હિતાવહ છે.
