ટેકનોલોજીની દુનિયામાં એક અદ્ભુત ક્રાંતિ જોવા મળી છે, જ્યાં એલોન મસ્કની પ્રખ્યાત બ્રેઈન-ચીપ કંપની 'ન્યુરલિંક' (Neuralink) ના ક્લિનિકલ ટ્રાયલના એક સહભાગીએ અશક્ય લાગતી બાબતને હકીકતમાં બદલી નાખી છે. ન્યુરલિંકના સત્તાવાર સોશિયલ મીડિયા હેન્ડલ પર શેર કરવામાં આવેલા એક વીડિયોમાં આ યુવક કોઈપણ જાતના ફિઝિકલ કંટ્રોલરને સ્પર્શ કર્યા વિના માત્ર પોતાના મગજના સિગ્નલ અને વિચારો દ્વારા અત્યંત લોકપ્રિય 'ગ્રાન્ડ થેફ્ટ ઓટો ૬' (GTA 6) ગેમ રમતો નજરે પડે છે. આ અદભુત પ્રદર્શન જોઈને ખુદ કંપનીના સ્થાપક એલોન મસ્ક પણ રોમાંચિત થઈ ગયા હતા અને સોશિયલ મીડિયા પર પ્રતિક્રિયા આપતા લખ્યું હતું કે, "ટેલિપથી દ્વારા GTA VI રમી રહ્યા છીએ."
આ વીડિયોમાં યુવક ખૂબ જ સહજતાથી પોતાના પાત્રની હિલચાલ, વિરોધીઓ સાથે લડાઈ અને સી-પ્લેન (જળ વિમાન) ઉડાડવા જેવા કાર્યો માત્ર મગજની શક્તિથી કરતો દેખાય છે. તેણે સમજાવ્યું કે તે માત્ર પોતાની રીંગ ફિંગર (ટચલી આંગળીની બાજુની આંગળી) ને ટેપ કરવા વિશે વિચારીને જ ગેમમાં ફાયરિંગ કે હુમલો કરી શકે છે. ભૂતકાળના પોતાના સંઘર્ષોને યાદ કરતા આ યુવકે જણાવ્યું કે બ્રેઈન ઈમ્પ્લાન્ટ પહેલા તે મોંમાં રાખવાની સ્ટીક અને આઈપેડની મદદથી ગેમ રમતો હતો, જેના કારણે તેના જડબામાં સતત દુખાવો રહેતો હતો. તે જૂની પદ્ધતિને વર્ણવતા કહે છે કે તે અનુભવ જાણે કોઈ પક્ષી આઈપેડ પર ચાંચ મારી રહ્યું હોય તેવો હતો, પરંતુ હવે આ નવી ટેકનોલોજીએ તેનું જીવન સંપૂર્ણપણે બદલી નાખ્યું છે.
જોકે, આ ભવ્ય સફળતાની સાથે ન્યુરલિંક દ્વારા એક સ્પષ્ટતા પણ કરવામાં આવી છે કે આ ઉપકરણો હજુ પ્રાયોગિક તબક્કામાં છે અને તેને યુએસ ફૂડ એન્ડ ડ્રગ એડમિનિસ્ટ્રેશન (FDA) કે અન્ય કોઈ નિયમનકારી સત્તાધિકારી દ્વારા વ્યાપારી ઉપયોગ માટે મંજૂર કરવામાં આવ્યા નથી. આ સામગ્રી માત્ર ક્લિનિકલ ટ્રાયલના સહભાગીઓના વ્યક્તિગત અનુભવો દર્શાવે છે. તેમ છતાં, મેડિકલ સાયન્સ અને ગેમિંગ ઉદ્યોગના સમન્વયરૂપ આ પ્રયોગે ભવિષ્યના પેરાલિસિસગ્રસ્ત દર્દીઓ માટે આશાનું એક નવું કિરણ જાગૃત કર્યું છે અને ટેક વર્લ્ડમાં ભારે ચર્ચા જગાવી છે.
