શહેરના નાગરિકોને પ્રાથમિક સુવિધાઓ પૂરી પાડવાની જવાબદારી સંભાળતી અમદાવાદ મ્યુનિસિપલ કોર્પોરેશન (AMC) ની પોતાની જ કચેરીઓની હાલત હાલ કફોડી બની ચૂકી છે. મેમકો ખાતે આવેલું મહાનગર સેવા સદનનું ઉત્તર ઝોન સંકુલ આજે વહીવટી ઉદાસીનતા અને જાળવણીના અભાવનું જીવંત ઉદાહરણ બની ગયું છે. કચેરીના વિવિધ ભાગોમાં દીવાલો અને બાહ્ય રચનાઓ જર્જરિત થઈ ગઈ છે, જ્યારે અંદરની વ્યવસ્થાઓ પણ પાટા પરથી ઉતરી ગઈ હોય તેવું સ્પષ્ટ દેખાઈ રહ્યું છે. આ ઝોનલ કચેરીમાં રોજબરોજ સેંકડો નાગરિકો પોતાના વિવિધ કામકાજ અર્થે આવતા હોય છે, પરંતુ અહીંની અવ્યવસ્થા જોઈને તેમને ભારે હાલાકીનો સામનો કરવો પડે છે.
આ કચેરીની ઇમારતના બાહ્ય ભાગમાં લગાવવામાં આવેલા આકર્ષક લાલ રંગના પથ્થરો અને ક્લેડિંગ હવે અનેક જગ્યાએથી ઉખડી ગયા છે, જેના કારણે બિલ્ડીંગનું શોષણ સ્પષ્ટ દેખાય છે. આશ્ચર્યજનક બાબત તો એ છે કે જવાબદાર અધિકારીઓ અને અહીં આવતા લોકો દ્વારા કચેરીની અનેક બારીઓ અને દિવાલો પર પાનની પીચકારીઓ મારીને ગંદકી ફેલાવવામાં આવી છે. સમગ્ર શહેરમાં સ્વચ્છતાનો મોટો સંદેશો આપીને કરોડો રૂપિયાનો ધુમાડો કરતું તંત્ર પોતાના જ કાર્યાલયની પવિત્રતા અને સ્વચ્છતા જાળવવામાં સંપૂર્ણપણે નિષ્ફળ સાબિત થયું છે. કચેરીના આંતરિક અને બાહ્ય પરિસરમાં ફેલાયેલી ગંદકી AMC ના દાવાઓની પોલ ખોલી નાખે છે.
પોતાની જ બિલ્ડીંગને સ્વચ્છ અને વ્યવસ્થિત ન રાખી શકનાર મ્યુનિસિપલ તંત્ર સામે હવે શહેરીજનોમાંથી ગંભીર સવાલો ઉઠી રહ્યા છે. નાગરિકોનું સ્પષ્ટપણે કહેવું છે કે જે તંત્ર સમગ્ર શહેરમાં સ્વચ્છતા અભિયાન ચલાવવા માટે કરોડો રૂપિયાનો ખર્ચ કરે છે, તેણે સૌથી પહેલા પોતાની ઘરઆંગણાની કચેરીઓ સુધારવી જોઈએ. ઉત્તર ઝોન કાર્યાલયની આ દયનીય સ્થિતિ અને ગંદકીના સામ્રાજ્યને કારણે જનમાનસમાં રોષની લાગણી પ્રસરતી જાય છે. સ્થાનિક લોકો અને અરજદારો દ્વારા એવી ઉગ્ર માંગ કરવામાં આવી રહી છે કે સત્વરે આ ઝોનલ કચેરીની મરામત કરવામાં આવે, સફાઈની યોગ્ય વ્યવસ્થા ગોઠવવામાં આવે અને સરકારી મિલકતને નુકસાન પહોંચાડનારાઓ સામે કડક પગલાં લેવામાં આવે.
