જામનગર શહેરમાં શીખ ધર્મના સ્થાપક અને પ્રથમ ગુરુ શ્રી ગુરુનાનક દેવજીની ૫૫૭મી જન્મજયંતિ એટલે કે પ્રકાશ પર્વની ઉજવણીનો આજથી ઉત્સાહભેર આરંભ થયો છે. આ પવિત્ર અવસર પર ગુરુદ્વારા સાહેબ ખાતેથી વહેલી સવારે એક ભવ્ય પ્રભાતફેરીનું આયોજન કરવામાં આવ્યું હતું. જેમાં શીખ સમાજના અગ્રણીઓ, ભાઈઓ-બહેનો અને મોટી સંખ્યામાં શ્રદ્ધાળુઓએ ઉત્સાહપૂર્વક ભાગ લીધો હતો. આ પ્રભાતફેરી ગુરુદ્વારાથી શરૂ થઈને ઇન્દિરા માર્ગ, સાત રસ્તા સર્કલ અને લાલ બંગલા સર્કલ જેવા મુખ્ય માર્ગો પર ફરીને પુનઃ ગુરુદ્વારા સાહેબ ખાતે સંપન્ન થઈ હતી. સમગ્ર રૂટ દરમિયાન ભજન-કીર્તનના મધુર નાદો અને ગુરુનાનક દેવજીના જયઘોષથી વાતાવરણ ગુંજી ઉઠ્યું હતું, જેનાથી સમગ્ર જામનગર નગરમાં અદ્ભુત આધ્યાત્મિક ચેતના જોવા મળી હતી.
પ્રકાશ પર્વની આ ઉજવણી માત્ર આજ પૂરતી મર્યાદિત નથી, પરંતુ આગામી દિવસોમાં પણ અનેક ધાર્મિક અનુષ્ઠાનો યોજાનાર છે. પ્રાપ્ત વિગતો અનુસાર, તા. ૧૯ થી ૨૨ નવેમ્બર દરમિયાન દરરોજ સવારે ૫:૪૫ વાગ્યે ગુરુદ્વારાથી શહેરના વિવિધ વિસ્તારોમાં પ્રભાતફેરી ભ્રમણ કરશે, જેથી શહેરીજનો પણ આ દિવ્ય પર્વની ઉજવણીમાં સહભાગી થઈ શકે. આ પર્વની પરાકાષ્ઠા રૂપે આગામી તા. ૨૨ નવેમ્બરના રોજ સવારે ૧૦ વાગ્યે ગુરુદ્વારા ખાતે અખંડ પાઠ સાહિબનો પ્રારંભ થશે, જેની પૂર્ણાહુતિ તા. ૨૪ નવેમ્બરના રોજ સવારે ૧૧ વાગ્યે કરવામાં આવશે. અખંડ પાઠની પૂર્ણાહુતિ બાદ ભક્તો માટે વિશેષ ધાર્મિક લાભની વહેંચણી કરવામાં આવશે.
આ ભવ્ય ધાર્મિક મહોત્સવને સફળ બનાવવા માટે જામનગરના સમગ્ર શીખ સમાજ દ્વારા વ્યાપક તૈયારીઓ કરવામાં આવી છે. તા. ૨૪ નવેમ્બરે યોજાનાર પૂર્ણાહુતિ પ્રસંગે પ્રખ્યાત ગગનદીપસિંહ દ્વારા મધુર શબ્દ કીર્તનની પ્રસ્તુતિ કરવામાં આવશે, જે શ્રદ્ધાળુઓને મંત્રમુગ્ધ કરશે. કીર્તનની આ પવિત્ર સરવાણી બાદ સર્વધર્મ સમભાવ અને માનવતાના સંદેશ સાથે 'ગુરુ કા લંગર' (મહાપ્રસાદ)નું ભવ્ય આયોજન પણ કરવામાં આવ્યું છે. ગુરુનાનક દેવજીના આ પર્વ નિમિત્તે જામનગરના શીખ સમજમાં ભારે ઉત્સાહ અને આનંદની લહેર જોવા મળી રહી છે, અને તમામ શ્રદ્ધાળુઓ ગુરુજીના ચરણોમાં શીશ નમાવી ધન્યતા અનુભવી રહ્યા છે.
