JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
જામનગર

જામનગરમાં ભવ્ય ઉજવણી સાથે ગુંજ્યો ભગવાન બિરસા મુંડાના બલિદાન અને સંઘર્ષનો ઇતિહાસ

જામનગરમાં ભવ્ય ઉજવણી સાથે ગુંજ્યો ભગવાન બિરસા મુંડાના બલિદાન અને સંઘર્ષનો ઇતિહાસ
જામનગરના ટાઉનહોલ ખાતે ભગવાન બિરસા મુંડાની ૧૫૧મી જન્મજયંતિ નિમિત્તે જનજાતીય ગૌરવ દિવસની ઉત્સાહભેર ઉજવણી કરાઈ હતી. આ પ્રસંગે મહાનુભાવોની ઉપસ્થિતિમાં આદિવાસી સંસ્કૃતિના જતનનો સંદેશ આપી તેજસ્વી વિદ્યાર્થીઓનું સન્માન કરવામાં આવ્યું હતું.

જામનગરના પ્રખ્યાત શ્રી એમ. પી. શાહ મ્યુનિસિપલ ટાઉનહોલ ખાતે ભગવાન બિરસા મુંડાની ૧૫૧મી જન્મજયંતિ નિમિત્તે 'જનજાતીય ગૌરવ દિવસ-૨૦૨૬'ની અત્યંત ઉત્સાહ અને ભવ્યતા સાથે ઉજવણી કરવામાં આવી હતી. આ વિશેષ કાર્યક્રમની શરૂઆત ભગવાન બિરસા મુંડાની પ્રતિમાને પુષ્પાંજલિ અર્પણ કરીને તેમજ પરંપરાગત દીપ પ્રાગટ્ય દ્વારા કરવામાં આવી હતી. આ અવસરે મેયર મોનિકાબેન વ્યાસે ઉપસ્થિત સૌ મહાનુભાવો અને નગરજનોનું હાર્દિક સ્વાગત કરતા જનજાતીય અસ્મિતા અને સંસ્કૃતિના જતન પર ભાર મૂક્યો હતો. કાર્યક્રમમાં રાજ્યસભાના સંસદસભ્ય જીતેન્દ્રભાઈ કણઝારીયાએ પોતાના પ્રભાવશાળી સંબોધનમાં ભગવાન બિરસા મુંડાના અતૂટ સંઘર્ષ, બલિદાન તેમજ રાષ્ટ્રનિર્માણમાં આદિવાસી સમાજના અતૂલ્ય યોગદાનને યાદ કરી જનજાતીય ગૌરવ દિવસના મહત્ત્વ વિશે વિસ્તૃત પ્રકાશ પાડ્યો હતો.

આ કાર્યક્રમનું મુખ્ય આકર્ષણ વડાપ્રધાન નરેન્દ્રભાઈ મોદીની વિશેષ ઉપસ્થિતિમાં મહારાષ્ટ્રના ગઢચિરોલી ખાતે યોજાયેલા રાષ્ટ્રીય કાર્યક્રમના જીવંત પ્રસારણનું નિદર્શન રહ્યું હતું. ટાઉનહોલમાં ઉપસ્થિત પદાધિકારીઓ, વહીવટી અધિકારીઓ અને વિશાળ સંખ્યામાં આદિજાતિ સમુદાયના લોકોએ વડાપ્રધાનનું માર્ગદર્શન ઉત્સાહપૂર્વક નિહાળ્યું હતું. વડાપ્રધાને પોતાના ઉદ્બોધનમાં જનજાતીય સમાજના ગૌરવ, સન્માન અને રાષ્ટ્રના સર્વાંગી વિકાસમાં તેમની સક્રિય સહભાગિતાના સંકલ્પને વધુ દ્રઢ બનાવવાનો પ્રેરણાદાયી સંદેશ આપ્યો હતો, જેણે ઉપસ્થિત સૌ કોઈમાં નવું જોશ ભર્યું હતું.

ઉજવણીના ભાગરૂપે જનજાતીય સંસ્કૃતિ અને સમૃદ્ધ વારસાને ઉજાગર કરતી આકર્ષક સાંસ્કૃતિક કૃતિઓ રજૂ કરવામાં આવી હતી, જેણે ઉપસ્થિત સૌના દિલ જીતી લીધા હતા. આ સાંસ્કૃતિક માહોલ વચ્ચે શૈક્ષણિક અને સામાજિક ક્ષેત્રે ઉત્કૃષ્ટ દેખાવ કરનાર તેજસ્વી વિદ્યાર્થીઓ તેમજ પ્રેરણાદાયી કામગીરી કરનાર સામાજિક અગ્રણીઓને મહાનુભાવોના વરદ્ હસ્તે વિશેષ સન્માનિત કરવામાં આવ્યા હતા. આ સમગ્ર આયોજન દ્વારા જનજાતીય સમાજના આદર્શો અને તેમની ગૌરવશાળી પરંપરાને નવી પેઢી સુધી પહોંચાડવાનો સફળ પ્રયાસ કરવામાં આવ્યો હતો.

જામનગર વિભાગના વધુ સમાચાર

LATEST ARTICLES