અરવલ્લી જિલ્લાના મેઘરાજ તાલુકાના ભેમાપુર ખાતે ઠાકોર સમાજના યુવાનો એક મંચ પર એકઠા થઈને રાજ્ય સરકાર સમક્ષ એક મોટો પડકાર ફેંક્યો છે. આ બેઠકમાં યુવાનોએ O.B.C. અનામતના વર્ગીકરણની તાત્કાલિક અમલવારી કરવા પર ભાર મૂક્યો હતો. સમાજમાં શિક્ષણનો વ્યાપ વધારવાની સાથે રોજગારની સમાન તકો પૂરી પાડવા અને યુવાનોને વ્યસનમુક્ત બનાવી એક સબળ સમાજનું નિર્માણ કરવા અંગે ગહન ચર્ચા કરવામાં આવી હતી. અનામતના યોગ્ય વર્ગીકરણના અભાવે વંચિત રહેતા વર્ગોને ન્યાય અપાવવા માટે આ બેઠક સીમાચિહ્નરૂપ સાબિત થઈ શકે છે.
ચર્ચા દરમિયાન યુવાનોએ સ્પષ્ટ શબ્દોમાં ચેતવણી આપી હતી કે જો સરકાર દ્વારા તેમની આ ન્યાયી માંગણીઓ પર સમયસર ધ્યાન આપવામાં નહીં આવે, તો આગામી દિવસોમાં ઉગ્ર આંદોલન કરવામાં આવશે. આંદોલનકારીઓએ રાજકીય સમીકરણો પર પ્રહાર કરતા જણાવ્યું હતું કે, આગામી 2027ની વિધાનસભા ચૂંટણીમાં ઠાકોર, કોળી અને અન્ય પછાત વર્ગના વિકાસથી વંચિત સમાજના મતવિસ્તાર અને સમર્થન વગર કોઈપણ રાજકીય પક્ષ માટે સત્તા સુધી પહોંચવું અસંભવ બનશે. સમાજના હકો માટે હવે રાજકીય પક્ષોએ પણ ગંભીરતાથી વિચારવાનો સમય આવી ગયો છે તેવી લોકભાવના આ બેઠકમાં પ્રબળ બની હતી.
વધુમાં, ઠાકોર સમાજના આગેવાનોએ વર્ષ 2015-16 દરમિયાન ગાજેલા પાટીદાર અનામત આંદોલનનો ઉલ્લેખ કરતા જણાવ્યું હતું કે જો 2027ની ચૂંટણી પહેલા OBC અનામતનું વર્ગીકરણ લાગુ નહીં કરાય, તો તેમનો સમાજ તેનાથી પણ મોટું અને વ્યાપક આંદોલન છેડશે. રાજ્ય સરકાર માટે આ એક સ્પષ્ટ અને ગંભીર ચેતવણી સમાન છે, કારણ કે પછાત વર્ગોનો આ રોષ આગામી રાજકીય માહોલને મોટો આંચકો આપી શકે છે. સરકારે આ મામલે તાત્કાલિક યોગ્ય નીતિગત પગલાં નહીં ભર્યા તો સ્થિતિ વધુ વણસી શકે છે.
