ગુરુવારે રાત્રે અચાનક સર્જાયેલી તકનીકી ખામીના કારણે માઈક્રોસોફ્ટ 365 ની મહત્વપૂર્ણ સેવાઓ જેવી કે આઉટલૂક (Outlook) અને ટીમ્સ (Teams) લાંબા સમયથી ઠપ થઈ ગઈ હતી, જેનાથી વિશ્વભરના લાખો યુઝર્સ મુશ્કેલીમાં મુકાયા હતા. સોશિયલ મીડિયા અને રિપોર્ટ્સ અનુસાર, આ આઉટેજની અસર ભારત સહિત અમેરિકા, જાપાન અને ઓસ્ટ્રેલિયા જેવા દેશોમાં પણ જોવા મળી હતી. ભારતમાં ઈન્ડિગો અને આકાશ એર જેવી એરલાઇન્સની ઈમેલ સપોર્ટ સેવાઓ પ્રભાવિત થઈ હતી, જ્યારે જાપાન અને બ્રિટનમાં સરકારી કામકાજ તેમજ પોલીસ વિભાગને પણ આ ખામીના કારણે ભારે હાલાકીનો સામનો કરવો પડ્યો હતો.
આ ગંભીર સમસ્યા પાછળ સાયબર હુમલો કે ટ્રાફિકનો અચાનક વધારો જવાબદાર હોવાની આશંકાઓને માઈક્રોસોફ્ટે સ્પષ્ટપણે નકારી કાઢી છે. કંપનીના અધિકારીઓના જણાવ્યા અનુસાર, અચાનક જ કેટલાક સર્વર્સ ઓફલાઈન થઈ ગયા હતા અને ચાલુ રહેલા સર્વર્સ પર વધુ પડતા ભારણને કારણે આ સિસ્ટમ કોલેપ્સ થઈ હતી. શરૂઆતમાં પેચ લગાવવાના પ્રયાસો ધાર્યા પ્રમાણે સફળ નહોતા રહ્યા, પરંતુ ત્યારબાદ કંપનીએ સર્વરની સ્થિરતા માટે ફાસ્ટેડ રિકવરી મોડ અપનાવ્યો હતો અને ઓથેન્ટિકેશન તથા રૂટીંગ સાથે જોડાયેલા ઘટકોમાં સુધારો કરીને સર્વર ક્ષમતા વધારવા માટે વર્ચ્યુઅલ મશીનો ઉમેર્યા હતા.
હાલમાં માઈક્રોસોફ્ટે જણાવ્યું છે કે તેમની ઈન્ટરનલ મોનિટરિંગ સિસ્ટમ અને કસ્ટમર્સના ફીડબેક મુજબ અનેક સેવાઓમાં 'ક્રમશઃ સુધારો' (incremental improvement) જોવા મળી રહ્યો છે, પરંતુ સર્વર હેલ્થ હજુ પણ અસ્થિર છે. કેટલાક યુઝર્સ માટે આ એપ્સ બરાબર કામ કરી રહી છે જ્યારે અન્ય કેટલાકને હજુ પણ કનેક્શન એરર આવી રહી છે. કંપનીએ હજુ સુધી સેવાઓ સંપૂર્ણપણે ક્યારે પૂર્વવત થશે તેની ચોક્કસ સમયમર્યાદા જાહેર કરી નથી, પરંતુ આઈટી એડમિનિસ્ટ્રેટર્સ માઈક્રોસોફ્ટ એડમિન સેન્ટર દ્વારા સ્થિતિ પર નજર રાખી શકે છે.
