વડાપ્રધાન નરેન્દ્ર મોદીના આજની ગુજરાત મુલાકાત અને મંત્રીઓ સાથેની બેઠકને લઈને રાજ્યના રાજકીય વર્તુળોમાં ભારે હલચલ મચી ગઈ છે. અગાઉના કાર્યક્રમ મુજબ વડાપ્રધાને લોકભવનમાં રાત્રી રોકાણ કર્યા બાદ લાભપાંચમના દિવસે અંબાજી માતાજીના દર્શનાર્થે જવાનું હતું. પરંતુ, તે દિવસે મંદિરમાં ભક્તોનો ભારે પ્રવાહ રહેવાનો હોવાથી સામાન્ય શ્રદ્ધાળુઓને કોઈ અગવડ ન પડે તે માટે વડાપ્રધાને પોતાના અંબાજી દર્શનનો કાર્યક્રમ સ્વેચ્છાએ મુલત્વી રાખ્યો છે. તેમ છતાં તેમનો ગુજરાત પ્રવાસ રદ થવાને બદલે માત્ર રાત્રી રોકાણ અને ડીનર માટે યથાવત રાખવામાં આવતા રાજકીય વિશ્લેષકો અને સામાન્ય જનતામાં 'કૈંક રંધાઈ રહ્યું છે' તેવી ચર્ચાઓએ જોર પકડ્યું છે.
આ મુલાકાત દરમિયાન યોજાનારી ઉચ્ચ સ્તરીય મંત્રીઓની બેઠક અત્યંત રહસ્યમય અને મહત્વપૂર્ણ માનવામાં આવી રહી છે. રાજ્યના તમામ મંત્રીઓને કોઈપણ પ્રકારના અંગત સચિવો કે સુરક્ષા કમાન્ડોને સાથે રાખ્યા વગર સાંજ સુધીમાં લોકભવન ખાતે હાજર રહેવા માટે કડક સૂચના આપવામાં આવી છે. વડાપ્રધાન મોદી આશરે સાડા આઠ વાગ્યે અમદાવાદ એરપોર્ટ પહોંચી સીધા લોકભવન જશે અને ત્યાં મંત્રીઓ સાથે મહત્વની બેઠક યોજશે. જોકે આ બેઠકનો કોઈ અધિકૃત એજન્ડા જાહેર કરવામાં આવ્યો નથી, પરંતુ મંત્રીઓને એકાંતમાં મળવાની આ શૈલી અને રાજકીય કવાયતને કારણે સરકાર અને સંગઠનના સ્તરે મોટા નિર્ણયો લેવાવાના સંકેતો મળી રહ્યા છે.
આગામી સમયમાં યોજાનારી ચૂંટણીઓને ધ્યાનમાં રાખીને આ બેઠકને અત્યંત વ્યૂહાત્મક માનવામાં આવી રહી છે. ગુજરાતમાં રાજકીય માહોલ પહેલેથી જ ગરમાયેલો છે ત્યારે અંદરખાને ચૂંટણીલક્ષી તૈયારીઓ અને પક્ષ-સરકારની કામગીરીની સમીક્ષા માટે આ બેઠક બોલાવાઈ હોવાની પ્રબળ સંભાવના છે. મંત્રીઓની કામગીરીનું મૂલ્યાંકન, વર્તમાન રાજકીય પડકારો અને ભવિષ્યની રણનીતિઓ પર આ બેઠકમાં મંથન થઈ શકે છે. વડાપ્રધાનની આ અણધારી અને ટૂંકી મુલાકાત રાજકીય મોરચે કોઈ મોટા પરિવર્તન અથવા નવા સમીકરણો રચવાના એંધાણ આપી રહી છે.
