સાબરકાંઠા જિલ્લાના ઇડર તાલુકા અંતર્ગત આવતા ડુંગરી ગામે સામાજિક સમરસતાને હચમચાવતી એક ગંભીર ઘટના પ્રકાશમાં આવી છે. ગામમાં મરણ પ્રસંગ વખતે મહિલાઓ દ્વારા સ્નાન કરવા માટે ઉપયોગમાં લેવાતા 'નાવણિયા'ના માલિકી અને ઉપયોગના પ્રશ્ને લાંબા સમયથી ચાલી રહેલો વિવાદ અચાનક ઉગ્ર સ્વરૂપ ધારણ કરી ગયો હતો. પ્રાપ્ત વિગતો અનુસાર, પટેલ સમાજ દ્વારા નાવણિયાના તાળા તોડી નાખવામાં આવ્યા હોવાના ગંભીર આક્ષેપોને કારણે બંને પક્ષો આમસામે આવી ગયા હતા અને મામલો જોતજોતામાં એક મોટા ધીંગાણામાં ફેરવાઈ ગયો હતો.
આ વિવાદ એટલો હદ સુધી વધી ગયો કે બંને સમાજના લોકો દ્વારા ઉશ્કેરાઈને સામસામે પથ્થરમારો શરૂ કરવામાં આવ્યો હતો. અચાનક ફાટી નીકળેલી આ હિંસાના કારણે આખા ડુંગરી ગામમાં અફરાતફરી અને ભયનો માહોલ છવાઈ ગયો હતો. પથ્થરમારાની આ ઘટનામાં દલિત સમાજના બે વ્યક્તિઓ ગંભીર રીતે ઘાયલ થયા હતા. આ બનાવની જાણ થતાં જ કાયદો અને વ્યવસ્થાની પરિસ્થિતિને કાબૂમાં લેવા માટે ત્વરિત ઘટનાસ્થળે પહોંચેલા એક પોલીસકર્મી પણ ઉપરોક્ત પથ્થરમારાની ચપેટમાં આવી જતા ઇજાગ્રસ્ત બન્યા હતા.
ઘટનાની ગંભીરતાને ધ્યાનમાં રાખીને તાત્કાલિક ધોરણે 108 એમ્બ્યુલન્સ સેવાને બોલાવવામાં આવી હતી, જેના દ્વારા તમામ ઇજાગ્રસ્તોને સારવાર અર્થે ઇડર સિવિલ હોસ્પિટલ ખાતે ખસેડવામાં આવ્યા છે. ગામમાં દરેક સમાજ માટે અલગ નાવણિયા હોવા છતાં આ પ્રકારે સામાન્ય બાબતમાં મોટો વિવાદ થવો અને હિંસા ફાટી નીકળવી તે સમગ્ર વિસ્તાર માટે ચિંતાનો વિષય બન્યો છે. હાલમાં ઉચ્ચ પોલીસ કાફલો ઘટનાસ્થળે તૈનાત છે અને સ્થિતિ સંપૂર્ણપણે નિયંત્રણ હેઠળ છે, ત્યારે પોલીસે બંને પક્ષોને શાંતિ જાળવવા અપીલ કરી કાયદેસરની કડક કાર્યવાહી કરવાની તજવીજ હાથ ધરી છે.
