દેશની અગ્રણી ડિજિટલ પેમેન્ટ કંપની પેટીએમ (Paytm) માટે એક મોટા રાહતના સમાચાર સામે આવ્યા છે. રિઝર્વ બેંક ઓફ ઇન્ડિયા (RBI) દ્વારા પેટીએમની સહાયક કંપની પેટીએમ પેમેન્ટ્સ સર્વિસિસ લિમિટેડને ડિજિટલ વોલેટ બિઝનેસ ફરીથી શરૂ કરવા માટે સૈદ્ધાંતિક મંજૂરી આપવામાં આવી છે. પેરન્ટ કંપની વન 97 કમ્યુનિકેશન્સે શેર બજારને આ અંગેની સત્તાવાર માહિતી આપી છે. આ મંજૂરી મળવાથી કંપની તેના પ્રીપેડ પેમેન્ટ ઇન્સ્ટ્રુમેન્ટ્સ અને ડિજિટલ વોલેટની સેવાઓ ફરીથી ગ્રાહકો સુધી પહોંચાડી શકશે, જોકે આ માટે તેણે અંતિમ અધિકૃતતા મેળવવાની પ્રક્રિયા પૂર્ણ કરવી પડશે.
અગાઉ નિયમકીય અને પાલન સંબંધિત (compliance) ચિંતાઓને કારણે જાન્યુઆરી 2024માં આરબીઆઈએ પેટીએમ પેમેન્ટ્સ બેંક પર નવા ડિપોઝિટ્સ અને વોલેટ ટોપ-અપ સ્વીકારવા પર કડક પ્રતિબંધો મૂક્યા હતા. જેના કારણે માર્ચ 2024થી આ સેવાઓ સંપૂર્ણપણે ઠપ થઈ ગઈ હતી અને કંપનીએ પોતાની કામગીરી અન્ય બેંકિંગ ભાગીદારો તરફ વાળવી પડી હતી. આ નિયમકીય કાર્યવાહીના લગભગ ત્રણ વર્ષ બાદ આવેલી આ સૈદ્ધાંતિક મંજૂરી પેટીએમ માટે તેના ફ્લેગશિપ કન્ઝ્યુમર પ્રોડક્ટ ગણાતા વોલેટ બિઝનેસને પુનઃજીવિત કરવા માટે એક નિર્ણાયક વળાંક સાબિત થશે.
નવા આદેશ મુજબ, પેટીએમ પેમેન્ટ્સ સર્વિસિસ લિમિટેડે આગામી છ મહિનાની અંદર સિસ્ટમ ઓડિટ અને સાયબર સિક્યોરિટી ઓડિટ પૂર્ણ કરીને તેનો અહેવાલ આરબીઆઈને સુપરત કરવાનો રહેશે. જો આ નિર્ધારિત સમયગાળામાં રિપોર્ટ જમા કરવામાં નહીં આવે, તો આ સૈદ્ધાંતિક મંજૂરી રદ થઈ જશે. કંપનીએ ડિસેમ્બર 2025માં આ લાયસન્સ માટે અરજી કરી હતી અને જૂન ક્વાર્ટરના પરિણામોમાં આ અંગે ખુલાસો કર્યો હતો. આ ઓડિટ પ્રક્રિયા સફળતાપૂર્વક પૂરી થયા બાદ પેટીએમનું ડિજિટલ વોલેટ ફરીથી પહેલાની જેમ સક્રિય થઈ જશે તેવી પૂરી શક્યતા છે.
