ઈરાનના પહાડોની ગોદમાં અને વાદળોની વચ્ચે વસેલું મસૂલેહ ગામ પોતાની એક અનોખી અને વિશિષ્ટ જીવનશૈલી માટે વૈશ્વિક સ્તરે જાણીતું બન્યું છે. તાજેતરમાં પાકિસ્તાનની ડિજિટલ કન્ટેન્ટ ક્રિએટર હાનિયા ઈબ્રાહિમે આ ૮૦૦ થી ૧૦૦૦ વર્ષ જૂના ઐતિહાસિક ગામની મુલાકાત લીધી હતી, જેનો વીડિયો સોશિયલ મીડિયા પર ખૂબ જ વાયરલ થઈ રહ્યો છે. આ ગામની સૌથી મોટી વિશેષતા તેની અદ્ભુત ભૌગોલિક બનાવટ છે, જ્યાં મકાનોને પહાડોના ઢોળાવ પર સીડીઓની માફક ગોઠવવામાં આવ્યા છે. આ અવિસ્મરણીય ડિઝાઇનને કારણે જ એક ઘરની છત બીજા ઘર માટે ચાલવાનો રસ્તો કે સડક બની જાય છે, જે જોઈને પ્રવાસીઓ પણ દંગ રહી જાય છે.
આ અનોખા ગામની અંદર કોઈ વાહનો કે મોટરકાર ચલાવવાની મનાઈ છે, જેના લીધે અહીં ટ્રાફિકના ઘોંઘાટથી મુક્ત સંપૂર્ણ શાંતિ જોવા મળે છે. યાત્રી હાનિયાના જણાવ્યા અનુસાર, આ ગામમાં વાહનોના શોરબકોરને બદલે માત્ર પક્ષીઓનો મધુર કલરવ સાંભળવા મળે છે અને અહીંની તાજી હવા પ્રવાસીઓને માનસિક સુકુન આપે છે. આ ગામની આ પ્રાકૃતિક સુંદરતા અને અલાયદી સંસ્કૃતિ એટલી મોહક છે કે તેને વર્ષ ૨૦૦૭માં યુનેસ્કો દ્વારા વર્લ્ડ હેરિટેજ સાઈટની ટેન્ટેટિવ લિસ્ટમાં પણ સ્થાન આપવામાં આવ્યું છે. કુદરતી નજારાઓ ઉપરાંત આ સ્થળ તેના પરંપરાગત હેન્ડીક્રાફ્ટ માટે પણ ખાસ્સું લોકપ્રિય છે, જે તેને પ્રવાસીઓ માટે એક પરફેક્ટ ડેસ્ટિનેશન બનાવે છે.
સોશિયલ મીડિયા પર આ ગામનો વીડિયો સામે આવ્યા બાદ યુઝર્સ તરફથી અનેક પ્રકારની રસપ્રદ પ્રતિક્રિયાઓ મળી રહી છે. કેટલાક સોશિયલ મીડિયા યૂઝર્સે આ સુંદર અને શાંત જગ્યાની મુલાકાત લેવાની ઈચ્છા વ્યક્ત કરી છે, તો કેટલાક યુઝર્સે મજાકિયા અંદાજમાં એવું પણ પૂછ્યું છે કે જો કોઈ રોજ તેમની છત પર ચાલશે તો તેઓ અવાજથી પરેશાન થઈ જશે. સોશિયલ મીડિયાના આ માધ્યમથી દુનિયાભરના લોકોને ઈરાનના આ છુપા ખજાના વિશે જાણવા મળ્યું છે, જે આધુનિક યુગમાં પણ પોતાની પ્રાચીન પરંપરા અને કુદરતી સ્વરૂપને અકબંધ જાળવી રાખવામાં સફળ રહ્યું છે.
