તેલંગાણાના કામારેડી જિલ્લાના બંસવાડા મંડલ અંતર્ગત આવતા હનમાજીપેટ ગામમાં ગત ૨૩ ઓક્ટોબર ૨૦૨૬ના રોજ ૨૬ વર્ષિય દૈનિક મજૂર ચકાલી ઉર્ફે ગુમ્માડી કાશીરામનો મૃતદેહ પચેરા ચેરુવુ તળાવ પાસેથી રહસ્યમય સંજોગોમાં મળી આવ્યો હતો. શરૂઆતમાં મૃતકના પિતા ચકાલી ભૂમૈયાની ફરિયાદના આધારે પોલીસે અકુદરતી કે શંકાસ્પદ મૃત્યુનો ગુનો નોંધીને તપાસ હાથ ધરી હતી. જોકે, પ્રાથમિક પોસ્ટમોર્ટમ રિપોર્ટ અને ઘટનાસ્થળની ઝીણવટભરી તપાસ બાદ આ મામલો અકસ્માતનો નહીં પરંતુ સુનિયોજિત હત્યાનો હોવાનું સ્પષ્ટ થતાં પોલીસે કલમ ૧૦૩ બીએનએસ હેઠળ ગુનો નોંધીને તપાસનો વ્યાપ વધાર્યો હતો.
પોલીસની ટેક્નિકલ ટીમ, સાક્ષીઓના નિવેદનો અને ગુપ્ત માહિતીના આધારે કરેલી કડક પૂછપરછમાં સમગ્ર પ્રકરણનો પર્દાફાશ થયો હતો. તપાસમાં બહાર આવ્યું કે મૃતક કાશીરામની પત્ની ગુમ્માડી સવિતાના ગામના જ બે યુવકો ચિંતકિંડી રામુ (જે દૈનિક મજૂર છે) અને પશુપુલ સંતોષ (જે ટ્રેક્ટર ડ્રાઈવર છે) સાથે અનૈતિક સંબંધો હતા. પોતાના આ ગેરકાયદેસર સંબંધોમાં પતિ કાશીરામ સતત અડચણરૂપ બની રહ્યો હતો, જેનાથી છુટકારો મેળવવા માટે પત્ની સવિતાએ તેના બંને પ્રેમીઓ સાથે મળીને પતિને હંમેશાં માટે રસ્તામાંથી હટાવવાનું ભયાનક પ્લાનિંગ કર્યું હતું.
યોજના મુજબ, ૨૩ ઓક્ટોબરની રાત્રે ત્રણેય આરોપીઓએ કાશીરામને દારૂ પીવાના બહાને બહાર બોલાવ્યો હતો અને ખૂબ નશો કરાવી દીધો હતો. કાશીરામ નશામાં ધૂત થઈ ગયા બાદ સંતોષે તેના હાથ પકડી રાખ્યા હતા અને રામુએ નાયલોનની દોરીથી તેનું ગળું ઘૂંટીને નિર્દયતાપૂર્વક ખૂન કરી નાખ્યું હતું. હત્યા બાદ આ ઘટનાને અકસ્માતમાં ખપાવવા અને પુરાવાનો નાશ કરવા માટે તેમણે લાશને તળાવમાં ફેંકી દીધી હતી. પોલીસે ત્રણેય આરોપીઓની ધરપકડ કરીને તેમની પાસેથી ગુનામાં વપરાયેલા મોબાઈલ ફોન અને અન્ય સામગ્રી જપ્ત કરી કાયદેસરની કાર્યવાહી હાથ ધરી છે.