ઉત્તર પ્રદેશની એટીએસ ટીમે એક મોટા કાવ્યનો પર્દાફાશ કરતા કાનપુરના ઘાટમપુર વિસ્તારમાં રહેતા 24 વર્ષીય અંકિત શંખવાર નામના યુવકને ઝડપી પાડ્યો છે. આ આરોપી 2021થી ફેક ઈમેલ આઈડી બનાવવાનું કામ કરતો હતો અને ફેસબુક ગ્રૂપ્સના માધ્યમથી તે પાકિસ્તાન, બાંગ્લાદેશ, તુર્કી અને ઇજિપ્ત જેવા દેશોમાં બેઠેલા શખ્સોને આ આઈડી વેચતો હતો. પોતાની ઓળખ છુપાવવા માટે તે વાઈફાઈ અને પ્રોક્સી નેટવર્કનો ઉપયોગ કરતો હતો. દિલ્હી, નોઈડા, ગુરુગ્રામ અને મુંબઈની શાળાઓ તેમજ મહત્વની સંસ્થાઓને જે બોમ્બની ધમકીઓ મળી હતી, તેના તાર આ ફેક ઈમેલ આઈડી સાથે જોડાયેલા હોવાનું તપાસમાં બહાર આવ્યું છે.
તપાસ દરમિયાન એટીએસને આરોપીના લેપટોપમાંથી એક્સેલ ફાઈલ સ્વરૂપે આશરે 5 Lakh ફેક ઈમેલ આઈડી મળી આવ્યા હતા, સાથે જ તેની પાસેથી એક મોબાઈલ ફોન પણ કબજે કરવામાં આવ્યો છે. 23 ઓક્ટોબરના રોજ મુંબઈ મેયરની ઓફિસને ઉડાવી દેવાની ધમકી આપવા માટે વપરાયેલું ઈમેલ આઈડી પણ આ જ લેપટોપમાંથી મળી આવ્યું હતું. આ સિવાય સિંગર દિલજીત દોસાંઝના દિલ્હી-એનસીઆર ખાતેના શો અને બોલિવૂડ એક્ટરના ઘરને પણ આ જ આઈડીથી ધમકીઓ આપવામાં આવી હતી. તપાસમાં એવું પણ ખૂલ્યું છે કે ફેક ઈમેલ આઈડીના બદલામાં આરોપીને બાઈનન્સ ક્રિપ્ટો વોલેટ દ્વારા પેમેન્ટ મળતું હતું. ફેસબુક અને વોટ્સએપના માધ્યમથી અંકિત અલમીન ઈસ્લામ નામના બાંગ્લાદેશી નાગરિકના સંપર્કમાં આવ્યો હતો, અને તેણે આ આઈડી સપ્લાય કરવા માટે 6,000 USD Tether ક્રિપ્ટોકરન્સી પણ ચૂકવી હતી.
ગૌતમ બુદ્ધ નગર, દિલ્હી અને ગુરુગ્રામની શાળાઓને એક સમાન આઈડી પરથી ધમકીભર્યા મેસેજ મળ્યા બાદ આ સમગ્ર કૌભાંડનો ભાંડો ફૂટ્યો હતો. આ ધમકીભર્યા મેસેજમાં ખાલિસ્તાન નેશનલ આર્મી અને બબ્બર ખાલસા જેવા સંગઠનોના નામનો ઉપયોગ કરવામાં આવ્યો હતો. ટેકનિકલ એનાલિસિસ કરતા આ મેસેજ કાનપુરમાંથી ઓપરેટ થતા હોવાનું સામે આવ્યું હતું, જેના આધારે એટીએસની ટીમ અંકિત સુધી પહોંચવામાં સફળ રહી હતી. હાલ એટીએસ દ્વારા આરોપીને કોર્ટમાં રજૂ કરીને પોલીસ કસ્ટડી મેળવવાની તજવીજ હાથ ધરવામાં આવી છે અને આંતરરાષ્ટ્રીય સ્તરે ફેલાયેલા આ નેટવર્કની વધુ તપાસ ચાલી રહી છે.
