કર્નાટકમાં સ્પેશિયલ ઇન્ટેન્સિવ રિવિઝન (SIR) ની પ્રક્રિયાને લઈને કોંગ્રેસ પાર્ટીની અંદર જ વિરોધાભાસ સામે આવ્યો છે. કર્નાટક સરકારના મંત્રી સતીશ જારકીહોળીએ એક ઇન્ટરવ્યુમાં દાવો કર્યો છે કે રાજ્યમાં આ પ્રક્રિયા બરાબર રીતે હેન્ડલ કરવામાં આવી હતી અને ચૂંટણી પંચ દ્વારા ડુપ્લીકેટ, મૃત્યુ પામેલા કે અન્ય સ્થળે શિફ્ટ થયેલા લગભગ 1 કરોડ વોટર્સના નામો સાચી રીતે જ દૂર કરવામાં આવ્યા છે. ખાસ વાત એ છે કે રાહુલ ગાંધી દ્વારા આ મુદ્દે અગાઉ સવાલો ઉઠાવવામાં આવ્યા હતા અને કર્નાટકને પહેલું એવું રાજ્ય ગણાવવામાં આવ્યું હતું જ્યાં વોટ ચોરી થઈ હોવાનો દાવો કરાયો હતો. સતીશ જારકીહોળીના આ નિવેદને પાર્ટીના સત્તાવાર સ્ટેન્ડથી બિલકુલ વિપરીત વલણ દાખવ્યું છે, જેના કારણે રાજકીય ગરમાવો આવી ગયો છે.
આ નિવેદન સામે આવતા જ ભાજપે સોશિયલ મીડિયા પ્લેટફોર્મ એક્સ પર પોસ્ટ કરીને રાહુલ ગાંધી પર આકરા પ્રહારો કર્યા હતા અને કહ્યું હતું કે ખુદ કોંગ્રેસ નેતાઓ જ સ્વીકારે છે કે સ્વચ્છ વોટર રોલ જરૂરી છે, જે રાહુલ ગાંધીની લોકશાહી વિરોધી માનસિકતાને ખુલ્લી પાડે છે. બીજી તરફ, કર્નાટક કોંગ્રેસ પ્રમુખ બી.કે. હરિપ્રસાદે અગાઉ આરોપ લગાવ્યો હતો કે આ પ્રક્રિયા લોકશાહીના મૂળિયા ઉખેડી નાખવા માટે ભાજપ દ્વારા ચૂંટણી પંચના દુરુપયોગથી કરવામાં આવી છે. મંત્રી સતીશ જારકીહોળીના આ અણધાર્યા નિવેદનથી પાર્ટીમાં અંદરખાને પણ નારાજગી જોવા મળી રહી છે, જેમાં પ્રિયંક ખાર્ગે જેવા નેતાઓએ પણ સવાલ ઉઠાવ્યા છે કે જારકીહોળી પાસે કઈ માહિતી છે કારણ કે ચિત્તાપુર જેવા વિસ્તારોમાં તો એક જ કોમ અને બૂથના લોકોના નામો લક્ષ્ય બનાવીને કમી કરવામાં આવ્યા હોવાનું તપાસમાં સામે આવ્યું હતું.
આ સમગ્ર વિવાદ એટલા માટે પણ મહત્વનો છે કારણ કે કોંગ્રેસ અને ઇન્ડિયા બ્લોક હાલમાં ચીફ ઇલેક્શન કમિશનર જ્ઞાનેશ કુમાર વિરુદ્ધ રવિવારે દિલ્હીના રામલીલા ગ્રાઉન્ડ ખાતે એક વિશાળ રેલી યોજવાની તૈયારી કરી રહ્યા છે અને કોંગ્રેસ અધ્યક્ષ મલ્લિકાર્જુન ખાર્ગેના ઘેર પીપલ્સ ઇમ્પીચમેન્ટનો કાર્યક્રમ પણ આયોજિત થવાનો છે. આવા સમયે જ સિદ્ધારમૈયાના ખાસ ગણાતા અને અગાઉ પણ પોતાના વિવાદાસ્પદ નિવેદનો માટે જાણીતા સતીશ જારકીહોળીના આ નિવેદને ભાજપને મોટો રાજકીય મુદ્દો આપી દીધો છે, જ્યારે કોંગ્રેસ નેતૃત્વ માટે આ સ્થિતિ ક્ષોભજનક સાબિત થઈ રહી છે.
