સુરેન્દ્રનગર જિલ્લાના ધ્રાંગધ્રા તાલુકાના હરીપર ગામે GIDC વિભાગ દ્વારા એક લોક સંવાદ કાર્યક્રમનું આયોજન કરવામાં આવ્યું હતું, પરંતુ આ કાર્યક્રમ શરૂ થતાની સાથે જ ભારે વિરોધ અને હોબાળાને કારણે ચર્ચામાં આવી ગયો હતો. GIDCના આયોજન સામે ગામના લોકોનો આક્રોશ એટલો બધો પ્રચંડ હતો કે જોતજોતામાં વાતાવરણ તણાવપૂર્ણ બની ગયું હતું અને મામલો સીધો ઘર્ષણ સુધી પહોંચી ગયો હતો. ગામના લોકોમાં પહેલેથી જ અસંતોષ હતો અને કાર્યક્રમ શરૂ થતા જ તે ખુલ્ને બહાર આવી ગયો હતો.
હરીપર ગામના અસંખ્ય ગ્રામજનો એકજૂથ થઈને મેદાને પડ્યા હતા અને સ્પષ્ટ ચીમકી આપી હતી કે તેઓ વિકાસના નામે પોતાના ગામની બરબાદી કોઈપણ ભོગે સાંખી લેશે નહીં. ગ્રામજનોનું સ્પષ્ટ માનવું છે કે GIDCના આગમનથી તેમની વર્ષોથી ખેતી માટે ઉપયોગમાં લેવાતી ફળદ્રુપ જમીન છીનવાઈ જશે અને સાથે જ સ્થાનિક પર્યાવરણને પણ વ્યાપક નુકસાન પહોંચશે. વિકાસના નામે ગામને બરબાદ નહીં કરવા દઈએ તેવા જોરદાર સૂત્રોચ્ચાર કરીને ગ્રામજનોએ પોતાનો રોષ વ્યક્ત કર્યો હતો.
વિરોધ એટલો બધો ઉગ્ર બની ગયો કે સ્થળ પર હાજર રહેલા મામલતદાર અને પોલીસ સહિતના અધિકારીઓ સામે ઘર્ષણ જેવી ગંભીર સ્થિતિ સર્જાઈ હતી. ગ્રામજનોનો ભારે આક્રોશ જોઈને GIDC વિભાગના અધિકારીઓ માટે લોક સંવાદ ચાલુ રાખવો અશક્ય બની ગયો હતો, જેથી તેઓ અધવચ્ચે જ કાર્યક્રમ અધૂરો છોડીને ત્યાંથી ચાલતી પકડવા મજબૂર બન્યા હતા. હવે આ વિરોધ બાદ સરકારી તંત્ર આગળ શું પગલાં ભરે છે અને ગ્રામજનોની આ રોષભરી માંગણીઓ સામે શું પ્રતિક્રિયા આપે છે તેના પર સૌની નજર ટકેલી છે.
