અમદાવાદ શહેરમાં ડ્રેનેજ સફાઈ અને ગટરકામ દરમિયાન મજૂરોના મોત થવાની તેમજ અન્ય દુર્ઘટનાઓની ગંભીર ઘટનાઓ સામે આવ્યા બાદ મ્યુનિસિપલ કોર્પોરેશનની સ્ટેન્ડિંગ કમિટીની બેઠકમાં આ મુદ્દે ભારે ગરમાગરમ ચર્ચા કરવામાં આવી હતી. સોલામાં બનેલી મજૂરના મોતની દુર્ઘટના તેમજ મનીષાના મોતની ઘટનાને લઈને કમિટી દ્વારા અત્યંત ગંભીર નોંધ લેવામાં આવી છે. બેઠકમાં સ્પષ્ટ સૂચના આપવામાં આવી છે કે માત્ર કોન્ટ્રાક્ટર કે ઇજારેદાર સામે જ નહીં, પરંતુ આ સમગ્ર પ્રકરણમાં મ્યુનિસિપલ કોર્પોરેશનના કયા અધિકારી કે કર્મચારીની બેદરકારી કે જવાબદારી છે, તેની પણ ઝીણવટભરી તપાસ કરવામાં આવે.
શહેરમાં ડ્રેનેજમાં માણસો ઉતરવા અને ગટર લાઈનો સંબંધિત અકસ્માતોમાં અગાઉ પણ અનેક વખત નિર્દોષ શ્રમિકોએ પોતાના પ્રાણ ગુમાવ્યા છે, જેને લઈને સ્ટેન્ડિંગ કમિટીના સભ્યો દ્વારા ભારે આક્રોશ વ્યક્ત કરવામાં આવ્યો હતો. સભ્યોએ રજૂઆત કરી હતી કે દર વખતે માત્ર કોન્ટ્રાક્ટર સામે સામાન્ય પગલાં લઈને સંતોષ માની લેવામાં આવે છે, પરંતુ જે તે વિસ્તારના જવાબદાર અધિકારીઓ અને સુપરવાઈઝર કર્મચારીઓની જવાબદારી પણ નિશ્ચિત થવી જોઈએ. સલામતીના નિયમોનું પાલન કરાવવાની જવાબદારી જે અધિકારીઓની છે, તેમની સામે પણ કડક ખાતાકીય કે ફોજદારી તપાસ થવી અનિવાર્ય છે જેથી ભવિષ્યમાં આવી ઘટનાઓ અટકી શકે.
આ બેઠકમાં અધિકારીઓ અને કર્મચારીઓની સંડોવણી તથા ફરજમાં બેદરકારી અંગે ઉચ્ચ સ્તરીય તપાસના આદેશો આપવામાં આવ્યા છે. ડ્રેનેજ સફાઈ અને મેનહોલ ખોલવા જેવી જોખમી કામગીરીમાં મેન્યુઅલ સ્કવેન્જિંગ એટલે કે હાથથી સફાઈ અટકાવવા અને તેના બદલે આધુનિક મશીનરીનો ઉપયોગ ફરજિયાત કરવા પર વિશેષ ભાર મૂકવામાં આવ્યો છે. તંત્રના આ કડક રૂખથી મનપાના બેદરકાર અધિકારીઓમાં ફફડાટ વ્યાપી ગયો છે, ત્યારે હવે આગામી દિવસોમાં દોષિતો અને જવાબદારો સામે કેવા કડક પગલાં લેવાય છે તેના પર સમગ્ર શહેરીજનોની નજર રહેશે.
