કોંગ્રેસના દિગ્ગજ નેતા રાહુલ ગાંધીએ ગુરુવારે એક વીડિયો સંદેશ જારી કરીને દેશવાસીઓને આગામી 1 નવેમ્બરે યોજાનારી વિપક્ષી INDIA બ્લૉકની ચલો દિલ્હી માર્ચમાં મોટી સંખ્યામાં ભાગ લેવા અપીલ કરી છે. તેમણે સ્પષ્ટ શબ્દોમાં કહ્યું કે નાગરિકોએ પોલીસ કે લાઠીચાર્જથી જરાય ડરવાની જરૂર નથી કારણ કે ભાજપ પાસે લોકશાહીના આવા અવાજોને દબાવવાની હિંમત નથી. દિલ્હીના રામલીલા મેદાન ખાતે યોજાનારી આ માર્ચનો મુખ્ય હેતુ દેશની લોકશાહી બચાવવા, વોટ ચોરી અટકાવવા અને બંધારણની રક્ષા કરવાનો છે. તેમણે પક્ષીય રાજકારણથી ઉપર ઉઠીને તમામ વિદ્યાર્થી જૂથો અને આમ નાગરિકોને દેશની આત્મા અને લોકશાહીના રક્ષણ માટે આગળ આવવા આહ્વાન કર્યું છે.
આ આંદોલન પાછળના મુખ્ય કારણો વિશે વાત કરતા કોંગ્રેસના નેતાઓએ જણાવ્યું કે દેશભરમાંથી મતદાર યાદીમાંથી 13 કરોડ જેટલા નામો ગાયબ કરી દેવામાં આવ્યા છે અને મોટાપાયે ગોટાળા થઈ રહ્યા છે. આ મુદ્દે વિપક્ષ દ્વારા શુક્રવારે કોંગ્રેસ અધ્યક્ષ મલ્લિકાર્જુન ખાર્ગેના નિવાસ્થાને ચીફ ઇલેક્શન કમિશનર ગ્યાનેશ કુમાર વિરુદ્ધ પબ્લિક ઇમ્પીચમેન્ટ પ્રોસીડિંગ પણ યોજાશે, જેની અધ્યક્ષતા લોકસભાના પૂર્વ સ્પીકર મિરા કુમાર કરશે. આ ઇમ્પીચમેન્ટ બાદ 1 નવેમ્બરે રામલીલા મેદાન સુધી વિશાળ માર્ચ અને રૅલીનું આયોજન કરવામાં આવ્યું છે, જેમાં ગ્યાનેશ કુમારના રાજીનામાની માંગ સાથે મોદી સરકારને ઉત્તરદાયી ઠેરવવામાં આવશે.
કોંગ્રેસના અન્ય નેતાઓએ પણ ભાજપ સરકાર પર પ્રહારો કરતા જણાવ્યું કે તેલંગાણામાં ટ્રેનો આપવાનો ઇનકાર કરવા કે દિલ્હીના વેપારીઓને રાજકીય હથિયાર બનાવવા છતાં ભાજપના આ માર્ચને નિષ્ફળ બનાવવાના પ્રયાસો સફળ નહીં થાય. આ વિરોધ પ્રદર્શન કોઈ એક પક્ષનું નહીં પરંતુ SIR પ્રક્રિયામાં કાયદાકીય રીતે મતદાનના અધિકારથી વંચિત કરાયેલા 13.30 કરોડ ભારતીયો માટે છે. પક્ષના નેતાઓએ પુનરોચ્ચાર કર્યો છે કે આ માર્ચ સંપૂર્ણપણે શાંતિપૂર્ણ રહેશે અને લાખો લોકો દેશના બંધારણ તથા લોકશાહીને બચાવવા માટે રસ્તા પર ઉતરીને સરકાર સામે મજબૂત અવાજ ઉઠાવશે.
