ગાંધીનગર જિલ્લાના કલોલ ખાતે બનેલા ગૌહત્યાના એક સનસનાટીભર્યા કેસમાં સેશન્સ કોર્ટે અત્યંત કડક અને ઐતિહાસિક ચુકાદો સંભળાવ્યો છે. અદાલતે ગુનાની ગંભીરતાને ધ્યાનમાં લઈને ત્રણ આરોપીઓ વસીમ કુરેશી, મોહમ્મદ રફિર કુરેશી અને અસ્ફાક બાહેલીમને આજીવન કેદની સજા ફટકારી છે, સાથે જ દરેક આરોપી પર રૂપિયા 2 લાખનો મોટો દંડ પણ ફટકાર્યો છે. ગૌહત્યાના આ ગંભીર મામલામાં કાયદાકીય લડાઈ અને મજબૂત પુરાવાઓના આધારે આવેલા આ ચુકાદાથી અપરાધીઓમાં ફફડાટ વ્યાપી ગયો છે.
આ ઘટના તારીખ 22 ઓગસ્ટ, 2024ના રોજ કલોલ તાલુકાના જામળા ગામની સીમમાં બની હતી, જ્યાં ગેરકાયદે ગૌકતલ કરવામાં આવ્યું હતું. આ ગુનાની ગંભીરતાને ધ્યાને લઈને કલોલ તાલુકા પોલીસે તાત્કાલિક ધોરણે સઘન તપાસ હાથ ધરી હતી અને ઘટના સ્થળેથી કુલ 277 કિલો ગૌમાંસ તથા અન્ય મુદ્દામાલ જપ્ત કરીને કાયદેસરની કાર્યવાહી પૂર્ણ કરી હતી. ત્યારબાદ આ કેસ કલોલ કોર્ટમાં ચલાવવામાં આવ્યો હતો જ્યાં એડિશનલ સેશન્સ જજ બી. આર. રાજપુતે સુનાવણી હાથ ધરી હતી. કેસની સુનાવણી દરમિયાન જજે ખૂબ જ મહત્વપૂર્ણ અવલોકનો કરતા ચુકાદામાં ઋગ્વેદ અને મનુ સ્મૃતિનો ઉલ્લેખ કર્યો હતો અને જણાવ્યું હતું કે ગાયને આપણા સમાજ અને ધર્મના એક અત્યંત મહત્ત્વપૂર્ણ આધારસ્તંભ તરીકે જોવામાં આવી છે, તેમજ જો આવા આરોપીઓને કડક સજા નહીં થાય તો ગૌમાતા પૃથ્વી પરથી લુપ્ત થઈ જશે.
કલોલ કોર્ટના આ કડક અને ન્યાયી ચુકાદાને ગુજરાતના નાયબ મુખ્યમંત્રી હર્ષ સંઘવીએ આવકાર્યો છે. તેમણે સ્પષ્ટ શબ્દોમાં જણાવ્યું હતું કે આ ચુકાદો એ વાતનો સ્પષ્ટ સંદેશ છે કે રાજ્યની ધરતી પર જે કોઈ ગૌહત્યા જેવા જઘન્ય અપરાધમાં સંડોવાશે તેમને કાયદો કોઈપણ સંજોગોમાં છોડશે નહીં. સાક્ષીઓની મજબૂત જુબાની અને પુરાવાઓના આધારે આવેલા આ સચોટ ચુકાદાથી ન્યાયતંત્રમાં લોકોનો વિશ્વાસ વધુ દ્રઢ બન્યો છે અને ભવિષ્યમાં આવા અપરાધો કરતા લોકો સો વાર વિચાર કરશે.
