તમિલનાડુ સરકાર દ્વારા રાજ્યના સોશિયલ જસ્ટિસ ડિપાર્ટમેન્ટ હેઠળ ચાલતી હોસ્ટેલ્સમાં રહેતા વિદ્યાર્થીઓ માટે એક શાનદાર સ્પોર્ટ્સ સ્કીમ લાવવામાં આવી છે. આ યોજના હેઠળ હવે ગરીબ અને સામાન્ય પરિવારના વિદ્યાર્થીઓ માત્ર ફૂટબોલ કે વોલીબોલ જેવી પરંપરાગત રમતો જ નહીં, પરંતુ દરિયાના મોજાં પર વિન્ડસર્ફિંગ કરવા અને આકાશમાં પેરાગ્લાઈડિંગ કે કાઈટ-સર્ફિંગ જેવી સાહસિક રમતો શીખવાની સુવિધા મેળવી શકશે. સામાન્ય રીતે આવી મોંઘી અને એડવેન્ચર રમતો સામાન્ય વિદ્યાર્થીઓની પહોંચ બહાર હોય છે, પરંતુ સરકારના આ નવા અભિગમથી હોસ્ટેલના વિદ્યાર્થીઓ માટે રમતના નવા દ્વાર ખુલશે.
આ યોજના અંતર્ગત ચેન્નાઈ અને તુતીકોરી (થૂથુકુડી) ખાતે પાયલોટ પ્રોજેક્ટ શરૂ કરવામાં આવશે, જેમાં સોશિયલ જસ્ટિસ ડિપાર્ટમેન્ટ અંદાજે 1400 જેટલી સંસ્થાઓ અને હોસ્ટેલ્સ પર નજર રાખશે. ડિપાર્ટમેન્ટના સેક્રેટરી એન સુબ્બૈયાના જણાવ્યા અનુસાર, ચેન્નાઈની કોલેજ હોસ્ટેલ્સમાં રહેતા વિદ્યાર્થીઓને સેલિંગ અને યાટિંગની ટ્રેનિંગ અપાશે, જ્યારે તુતીકોરીમાં કાયાકિંગ અને કાઈટ-સર્ફિંગની તાલીમ આપવામાં આવશે. આ માટે શારીરિક રીતે સક્ષમ અને રમતગમતમાં રસ ધરાવતા વિદ્યાર્થીઓની ખાસ પસંદગી કરવામાં આવશે અને ટ્રેનિંગ દરમિયાન સુરક્ષાનું સંપૂર્ણ ધ્યાન રાખવામાં આવશે.
આગામી સમયમાં સ્પોર્ટ્સ ડેવલપમેન્ટ ઓથોરિટી ઓફ તમિલનાડુ (SDAT) દ્વારા 'ધીરમ' અને 'શિખરમ' જેવી યોજનાઓ થકી રાજ્યના તમામ જિલ્લાઓમાં ટેલેન્ટ સ્ક્રિનિંગ ટેસ્ટ યોજવામાં આવશે. સોશિયલ જસ્ટિસ ડિપાર્ટમેન્ટના મિનિસ્ટર વન્ની અરાસુના જણાવ્યા મુજબ, ક્રિકેટ, ફૂટબોલ, બાસ્કેટબોલ તેમજ રનિંગ અને હાઈ જમ્પ જેવા સળંગ ટેસ્ટ દ્વારા હોસ્ટેલમાંથી હોશિયાર ખેલાડીઓ શોધી કાઢવામાં આવશે. સિલેક્ટ થયેલા આ યુવા ખેલાડીઓને નિષ્ણાતો દ્વારા ઇન્ટેન્સિવ ટ્રેનિંગ આપીને ડિસ્ટ્રિક્ટ અને સ્ટેટ લેવલની કોમ્પિટીશન માટે તૈયાર કરવામાં આવશે, જેથી રાજ્યની પ્રતિભાઓને મોટું પ્લેટફોર્મ મળી શકે.
