આણંદ સ્પેશિયલ ઓપરેશન ગ્રૂપ એટલે કે એસઓજીમાં ફરજ બજાવતા પીએસઆઈ વી.એન. રાઠોડ સામે લાંચ માંગવાનો ગંભીર મામલો સામે આવ્યો છે. એક ગુનાના સંદર્ભમાં ફરિયાદીનું બેંક એકાઉન્ટ સત્તાવાર રીતે ફ્રીઝ કરવામાં આવ્યું હતું. આ ફ્રીઝ થયેલું એકાઉન્ટ ફરીથી ચાલુ કરી આપવા અને તે ગુનામાં પોલીસ ધરપકડ ન કરે તે માટે પીએસઆઈ વી.એન. રાઠોડ દ્વારા 2 લાખ રૂપિયાની લાંચની માંગણી કરવામાં આવી હતી. આ ગેરકાયદેસર વહીવટ માટે દિલીપ પટેલ નામનો શખ્સ વચેટિયો બનીને લાંચની રકમ સ્વીકારવાનો હતો. પીડિત દ્વારા આ અંગે અમદાવાદ એસીબી સમક્ષ રજૂઆત કરવામાં આવતા એસીબીની ફીલ્ડ-1 ટીમ દ્વારા આ મામલે ગુનાની ગંભીરતાને પારખીને તાત્કાલિક છટકું ગોઠવવાનું આયોજન કરવામાં આવ્યું હતું.
પૂર્વ આયોજિત વ્યૂહરચનાના ભાગરૂપે એસીબીના પોલીસ ઇન્સ્પેક્ટર ડી.એન. પટેલ અને તેમની ટીમ આણંદ ખાતે આવેલી એસઓજી ઓફિસના દરવાજા પાસે પહોંચી ગઈ હતી. આ દરમિયાન વચેટિયા દિલીપ પટેલે એસઓજી ઓફિસના પ્રવેશદ્વાર નજીક પોતાની કારમાં બેસીને પીએસઆઈ વી.એન. રાઠોડના નામે 2 લાખ રૂપિયાની લાંચની રકમ સ્વીકારી હતી. જેવી લાંચના નાણાંની લેવડદેવડ પૂરી થઈ કે તરત જ એસીબીની ટીમે તરાપ મારીને વચેટિયા દિલીપ પટેલને રંગેહાથ દબોચી લીધો હતો અને લાંચના નાણાં પણ જપ્ત કરી લીધા હતા. જોકે, આ દરોડા દરમિયાન મુખ્ય આરોપી ગણાતા એસઓજીના પીએસઆઈ વી.એન. રાઠોડ ઘટનાસ્થળે હાજર મળી આવ્યા નહોતા.
આ ટ્રેપ દરમિયાન સૌથી મોટો ધડાકો ત્યારે થયો જ્યારે એસીબીની ટીમે પકડાયેલા આરોપી દિલીપ પટેલની કારની ઝીણવટભરી તલાશી લીધી હતી. કારમાંથી લાંચના 2 લાખ રૂપિયા તો મળી જ આવ્યા, પરંતુ સાથેસાથે અન્ય 49 લાખ રૂપિયાની માતબર રોકડ રકમ પણ મળી આવી હતી. અચાનક આટલી મોટી રોકડ રકમ જોઈને તપાસકર્તા અધિકારીઓ પણ ચોંકી ઉઠ્યા હતા અને આ શંકાસ્પદ નાણાં પણ જપ્ત કરી લીધા હતા. આ નાણાં ક્યાંથી આવ્યા, કોના છે તેમજ કયા ગેરકાયદેસર હેતુ માટે રાખવામાં આવ્યા હતા તે અંગે એસીબી દ્વારા ઊંડાણપૂર્વકની તપાસ શરૂ કરવામાં આવી છે. આ પ્રકરણમાં પીએસઆઈ વી.એન. રાઠોડ અને વચેટિયો દિલીપ પટેલ બંને વિરુદ્ધ કાયદેસરનો સકંજો કસીને વધુ તપાસ જારી રાખવામાં આવી છે.
