યમનના પશ્ચિમમાં આવેલા તાઝ પ્રોવિન્સના અલ-બારાહ વિસ્તારમાં સાઉદી સેના દ્વારા એક રેસિડેન્શિયલ એરિયાને નિશાન બનાવીને ભીષણ હવાઈ હુમલા કરવામાં આવ્યા હતા. હુથી હેલ્થ મંત્રાલયે જારી કરેલા નિવેદન મુજબ, સાઉદી દુશ્મનોએ મકબાના ડિસ્ટ્રિક્ટમાં રહેતા ઈબ્રાહીમ સાઈદ મોહમ્મદ અહેમદ અલ-કૌઝ અને અલ-રાબી સાઈદ મોહમ્મદ અહેમદ અલ-કૌઝના પરિવારોની ઘરોને ટાર્ગેટ કર્યા હતા, જેમાં પ્રાથમિક અહેવાલ મુજબ 12 નાગરિકો માર્યા ગયા છે અને 3 લોકો ગંભીર રીતે ઘાયલ થયા છે. આ ઘટના બાદ સમગ્ર વિસ્તારમાં અફરાતફરીનો માહોલ સર્જાયો છે અને રાહત તથા બચાવ કામગીરી ચાલી રહી છે.
વર્ષ 2022માં થયેલું નાજુક યુદ્ધવિરામ આ વર્ષે ઉનાળામાં સત્તાવાર રીતે તૂટી ગયું હતું, ત્યારથી હુથી વિદ્રોહીઓ અને સાઉદી સમર્થિત યમનની સરકાર વચ્ચે રોજબરોજ હુમલાઓ થઈ રહ્યા છે. બુધવારે જ સાઉદીના પેટ્રોલ પંપ અને માર્કેટ પર થયેલા હુમલામાં 14 લોકો માર્યા ગયા હતા, જ્યારે વળતા પ્રહારમાં હુથીઓએ પણ એડન એરપોર્ટને ટાર્ગેટ કર્યું હતું. યુનાઈટેડ નેશન્સના આંકડા મુજબ, તાજેતરની શત્રુતા ફરી શરૂ થઈ ત્યારથી અત્યાર સુધીમાં 1600થી વધુ લોકોના મોત થયા છે અને 275,000 કરતા વધુ લોકો વિસ્થાપિત થયા છે. હુથીઓએ સાઉદી અરેબિયા પર મરીટાઈમ બ્લોકેડ જાહેર કરીને તેના જહાજો અને ઓઈલ ફેસિલિટીઝ પર હુમલા કરવાનું પણ શરૂ કરી દીધું છે.
યમન દેશ વર્ષ 2014થી સતત યુદ્ધ અને સંઘર્ષનો સામનો કરી રહ્યો છે, જ્યારે હુથીઓએ દેશની રાજધાની પર કબજો જમાવી લીધો હતો અને તેના એક વર્ષ બાદ સરકારી સમર્થનમાં સાઉદીની આગેવાની હેઠળનું ગઠબંધન આ જંગમાં કૂદી પડ્યું હતું. તાજેતરના મહિનાઓમાં હુથીઓએ સાઉદી અરેબિયા વિરુદ્ધ પોતાના હુમલાઓ ખૂબ જ વધારી દીધા છે અને રેડ સી કોસ્ટ પર પણ પોતાનું નિયંત્રણ મજબૂત કર્યું છે. બંને પક્ષો વચ્ચે ચાલી રહેલા આ ઘાતક સંઘર્ષના કારણે સામાન્ય જનતાનું જીવન નર્ક બની ગયું છે અને આવનારા દિવસોમાં પરિસ્થિતિ વધુ વણસવાની આશંકા વ્યક્ત કરવામાં આવી રહી છે.
