ગ્લોબલ ગ્રોસરી ડિલિવરી માર્કેટમાં અત્યાર સુધીની સૌથી મોટી હલચલ મચી ગઈ છે, કારણ કે પ્રખ્યાત ડિલિવરી કંપની ડોર્ડશે ઇન્સ્ટાકાર્ટને ખરીદવા માટે 17 અબજ ડૉલરની જંગી ઓફર કરી છે. આ મેગા ડીલના સમાચાર બહાર આવતા જ યુએસ સ્ટોક માર્કેટમાં ભારે ઉથલપાથલ થઈ હતી અને ગુરુવારે વોલ સ્ટ્રીટ પર ડોર્ડશના શેરમાં જબરદસ્ત ઉછાળો જોવા મળ્યો હતો, જ્યારે સામે પક્ષે ઇન્સ્ટાકાર્ટના શેરના ભાવમાં ઘટાડો નોંધાયો હતો. આ ડીલ હેઠળ ડોર્ડશ દ્વારા ઇન્સ્ટાકાર્ટના પ્રતિ શેર 65 ડૉલર ચૂકવવામાં આવશે, જે 22 ઓક્ટોબરના ક્લોઝિંગ પ્રાઈઝ પર 26 ટકાનું પ્રીમિયમ દર્શાવે છે. સેન ફ્રાન્સિસ્કોમાં 2013માં સ્થપાયેલી ડોર્ડશ કંપની આ સોદા દ્વારા ગ્રોસરી માર્કેટમાં પોતાની પકડ વધુ મજબૂત કરવા માગે છે.
આ સોદાની વિગતો મુજબ, ડોર્ડશે સ્પષ્ટ કર્યું છે કે ઇન્સ્ટાકાર્ટનું બ્રાન્ડ નેમ અને એપ પહેલાની જેમ જ ચાલુ રહેશે તેમજ તેના શોપર્સ પણ અગાઉની જેમ જ ઓર્ડર પૂરા કરી શકશે. ઇન્સ્ટાકાર્ટના શેરહોલ્ડર્સ કેશ, ડોર્ડશના શેર અથવા બંનેના મિશ્રણમાંથી પેમેન્ટનો વિકલ્પ પસંદ કરી શકશે, જોકે સ્ટોક કુલ પેમેન્ટના ચોથા ભાગથી વધુ નહીં હોય. નાસ્ડેક પર ડોર્ડશનો શેર 2.96 ટકા અથવા 5.01 પોઈન્ટ વધીને 174.50 ડૉલર પર પહોંચ્યો હતો, જ્યારે ઇન્સ્ટાકાર્ટનો શેર 0.86 ટકા ઘટીને 57.92 ડૉલર પર બંધ થયો હતો. 2012માં શરૂ થયેલી ઇન્સ્ટાકાર્ટ યુએસ અને કેનેડામાં ગ્રોસરી અને કન્વિનિયન્સ સ્ટોર ડિલિવરીમાં નિષ્ણાત છે, જેના હાલમાં 600,000 જેટલા સ્વતંત્ર શોપર્સ કામ કરી રહ્યા છે.
આ ડીલ પૂરી થતાં ઇન્સ્ટાકાર્ટના ગ્રાહકોને ડોર્ડશ દ્વારા કવર થતા વધારાના 50,000 સ્ટોર્સની એક્સેસ મળી જશે. છેલ્લા કેટલાક વર્ષોમાં ડોર્ડશનું માર્કેટ શેર 44 ટકાથી વધીને 59 ટકા થઈ ગયું છે, જ્યારે ઇન્સ્ટાકાર્ટનો હિસ્સો 26 ટકાથી ઘટીને 18 ટકા પર આવી ગયો છે. આ ટ્રાન્ઝેક્શનને યુએસ, કેનેડા અને ઇઝરાઈલના રેગ્યુલેટરી ક્લિયરન્સ તથા શેરહોલ્ડર્સની મંજૂરી મળ્યા બાદ વર્ષ 2027ના અંત સુધીમાં અથવા 2028ના પહેલા ભાગમાં આખરી રૂપ આપવામાં આવશે તેવી અપેક્ષા છે. આ ડીલથી ગ્રોસરી ડિલિવરી ક્ષેત્રમાં મોટું એકત્રીકરણ જોવા મળશે અને માર્કેટનું આખું સમીકરણ જ બદલાઈ જશે.
