અમદાવાદમાં રહેતા એક યુવા દંપતીએ પોતાની મહેનત અને લગ્નને જોરે એક નાની શરૂઆતને આખી સક્સેસ સ્ટોરીમાં બદલી નાખી છે. સોફ્ટવેર એન્જિનિયર દર્શન ઝિંઝુવાડીયા અને તેમની પત્ની શ્રુતિએ જુલાઈ 2025 માં માત્ર 2000 થી 3000 રૂપિયાનું પ્રારંભિક રોકાણ કરીને કારની ડીકીમાંથી જ કોલ્ડ કોકો અને કોલ્ડ કોફી વેચવાનો બિઝનેસ શરૂ કર્યો હતો. કોઈ મિત્રના પ્રોત્સાહનથી શરૂ થયેલી આ ગાડી શરૂઆતમાં રોજની માત્ર 14 બોટલ વેચતી હતી, પરંતુ આજે આ દંપતીની મહેનત રંગ લાવી છે અને તેમનો આ નાનો આઈડિયા એક મોટો બિઝનેસ બની ગયો છે. ગ્રાહકોનો ભારે પ્રેમ મળતા શ્રુતિએ પોતાની નોકરી છોડી દીધી અને પૂરા સમય માટે આ બિઝનેસમાં જોડાઈ ગઈ, જ્યારે દર્શન પોતાની ઓફિસના સમય સાચવીને આ કામ સંભાળે છે.
આ બિઝનેસનું ટાઈમટેબલ પણ ઘણું રસપ્રદ છે, જ્યાં દર્શન ઓફિસથી ઘરે આવે પછી બંને રાત્રે 9 થી 12 વાગ્યા સુધી ગોતા વિસ્તારના દેવ નગર ખાતે આવેલા પરिवार હોમ્સ પાસે ગાડી લઈને ગ્રાહકોને કોકો પીવડાવવા નીકળી પડે છે. શરૂઆતના દિવસોમાંથી આગળ વધીને અત્યાર સુધીમાં તેઓ કુલ 30,000 થી વધુ બોટલ્સ વેચી ચૂક્યા છે અને તેમની કુલ કમાણી 36 લાખ રૂપિયાને પાર થઈ ગઈ છે. ખાસ કરીને નવરાત્રીના માત્ર 9 દિવસમાં જ આ કપલે આશ્ચર્યજનક રીતે 7,500 બોટલનું વેચાણ કર્યું હતું. હાલમાં આ બિઝનેસનું દૈનિક વેચાણ 20,000 રૂપિયા અને માસિક રેવન્યુ આશરે 6 લાખ રૂપિયા આસપાસ પહોંચી ગઈ છે, જેમાં કાચા માલ અને બોટલનો ખર્ચ બાદ કરતા ઓપરેટિંગ ખર્ચ મહિને 1.5 લાખથી 2 લાખ રૂપિયા થાય છે.
આજે દર્શન અને શ્રુતિ પોતાના દમ પર આ સફળતા માણી રહ્યા છે, જ્યાં એન્જિનિયરિંગ કરનાર દર્શન અને ફાઇનાન્સમાં એમબીએ કરનાર શ્રુતિ બંને પોતાની લાયકાતનો સાચો ઉપયોગ કરી રહ્યા છે. ઝોમેટો પર લિસ્ટેડ આઉટલેટમાં ક્લાસિક કોલ્ડ કોકોની કિંમત 120 રૂપિયા, 2-ઇન-1 કોલ્ડ કોકોની કિંમત 169 રૂપિયા અને ક્લાસિક કોલ્ડ કોફીની કિંમત 119 રૂપિયા રાખવામાં આવી છે. શ્રુતિના જણાવ્યા અનુસાર, નોકરી છોડીને ઝીરોથી શરૂઆત કરવાનો આ નિર્ણય તેમના માટે સ્વતંત્રતા, શીખવા અને ગ્રાહકો સાથે ડીલ કરવાની સાચી તાકાત બની રહ્યો છે, અને આગામી સમયમાં આ બિઝનેસને વધુ મોટો બનાવવાની તેમની તૈયારી છે.
