રાજ્ય સરકાર દ્વારા જાહેર રસ્તાઓ, સરકારી જમીનો અને ગૌચરની જમીનો પર થયેલાં ગેરકાયદે દબાણો સામે લાલ આંખ કરવામાં આવી છે. આ મામલે સરકારની કડક સૂચના મળતાં જ રાજકોટ જિલ્લા વહીવટી તંત્ર સફાળું જાગી ગયું છે અને કલેક્ટર ઓમ પ્રકાશે જિલ્લાના તમામ મામલતદારો તેમજ પ્રાંત અધિકારીઓને તાત્કાલિક ધોરણે દબાણો દૂર કરવાની પ્રક્રિયા હાથ ધરવા આદેશ કર્યો છે. આગામી દિવાળીના તહેવારો પૂરા થતાની સાથે જ હાઇવે સહિતની સરકારી જગ્યાઓ પરથી દબાણો હટાવવા માટે ડિમોલિશન અને જમીન માપણીની કામગીરી પૂરજોશમાં શરૂ કરી દેવામાં આવશે.
તંત્રની આ યોજના મુજબ રાજકોટ શહેર અને સમગ્ર જિલ્લામાં હાઇવેની આસપાસ, સરકારી પડતર જમીનો તથા પશુઓ માટેની ગૌચરની જમીનો પર થયેલાં દબાણોની સચોટ ઓળખ કરવા માટે વ્યાપક સર્વે હાથ ધરાશે. આ કામગીરી માટે સંબંધિત અધિકારીઓને કોઈ પણ પ્રકારની બેદરકારી ન રાખવાની સ્પષ્ટ તાકીદ કરવામાં આવી છે. મહત્ત્વની વાત એ છે કે જાહેર ઉપયોગની અને સરકારી જમીનો પરના દબાણો નક્કી કરવા માટે હાથ ધરનારી જમીનની માપણીની પ્રક્રિયા સંપૂર્ણપણે નિ:શુલ્ક રહેશે અને તેના માટે કોઈ પણ પ્રકારની ફી વસૂલવામાં આવશે નહીં જેથી કામ ઝડપથી પતી શકે.
જિલ્લા વહીવટી તંત્રના આ કડક રૂખને કારણે ગેરકાયદે દબાણકર્તાઓમાં ભારે ફફડાટ ફેલાઈ ગયો છે. સરકારી જમીનોને દબાણમુક્ત બનાવીને જાહેર સંપત્તિનું રક્ષણ કરવું એ આ આખી કાર્યવાહીનો મુખ્ય ઉદ્દેશ્ય છે, જેથી સામાન્ય પ્રજા કે વાહનચાલકોને કોઈ મુશ્કેલી ન પડે. હવે દિવાળી બાદ કઈ જગ્યાઓ પર સૌથી પહેલાં બૂલડોઝર ચાલશે અને તંત્ર આ મામલે કેટલી કડકાઈ દાખવશે તેના પર સૌની મીટ માંડાઈ છે.
