ચેન્નઈમાં પ્રોફેસર અને જાણીતા અર્થશાસ્ત્રી પ્રો. એ. કલૈયાહરસનની પોલીસ દ્વારા કરવામાં આવેલી અટકાયતને લઈને તમિલનાડુમાં ભારે રાજકીય ગરમાવો આવ્યો છે. કોઈ અન્ય સાથે જોડાયેલી સોશિયલ મીડિયા પોસ્ટના મામલામાં અગ્રણી શૈક્ષણિક સંસ્થાના પ્રોફેસરને નિશાન બનાવવામાં આવતા વિપક્ષી નેતાઓ લાલઘૂમ થયા છે. પૂર્વ ચીફ મિનિસ્ટર એમ.કે. સ્ટાલિન અને લેફ્ટ પાર્ટીના નેતાઓએ આ ઘટનાની આકરી ટીકા કરી છે અને સી. જોસેફ વિજયની આગેવાની હેઠળની ટીવીકે સરકાર સામે સવાલો ઉઠાવ્યા છે. આ મામલે તમિલનાડુના ડાયરેક્ટર જનરલ ઓફ પોલીસ (ડીજીપી) સમક્ષ ફરિયાદ પણ કરવામાં આવી છે.
મળતી વિગતો મુજબ, ગત 28 ઓક્ટોબરના રોજ વહેલી સવારે 5 વાગ્યે પોલીસ કર્મચારીઓ પ્રોફેસરના ઘરે પહોંચ્યા હતા અને ફેક સોશિયલ મીડિયા પોસ્ટના સિલસિલામાં તેમની અટકાયત કરી હતી. તેમને પ્રાઇવેટ વ્હીકલમાં બેસાડીને લઈ જવામાં આવ્યા હતા અને ગુનેગાર જેવું વર્તન કરી તેમનું મોબાઈલ ફોન પણ જપ્ત કરવામાં આવ્યું હતું. જોકે, આ લગભગ 2 કલાકની કનડગત બાદ પોલીસે તેમને પાછા તેમના ઘરમાં છોડી દીધા હતા. આ ઘટનાના થોડા દિવસો પહેલા જ પ્રોફેસરે એક ન્યૂઝ ચેનલને મોંઘવારી મુદ્દે ઇન્ટરવ્યુ આપ્યો હતો. એમ.કે. સ્ટાલિને એક્સ પર પોસ્ટ કરીને જણાવ્યું હતું કે પ્રોફેસર કલૈયાહરસન કોઈ સામાન્ય વ્યક્તિ નથી, પરંતુ મદ્રાસ ઇન્સ્ટિટ્યુટ ઓફ ડેવલપમેન્ટ સ્ટડીઝના પ્રોફેસર છે અને તેમણે જેએનયુમાંથી પીએચડી મેળવ્યું છે તેમજ કેમ્બ્રિજ યુનિવર્સિટી પ્રેસ દ્વારા પ્રકાશિત પુસ્તક ધ દ્રવિડિયન મોડેલના સહ-લેખક પણ છે.
સ્ટાલિને આ કાર્યવાહીને ફાસીવાદ ગણાવીને ચીફ મિનિસ્ટર સી. જોસેફ વિજય પાસે જાહેરમાં માફીની માંગણી કરી છે અને સવાલ કર્યો છે કે શું મોંઘવારી ઉજાગર કરવા બદલ અથવા પુસ્તક લખવા બદલ પ્રોફેસરની અટકાયત કરાઈ હતી? સીપીએમ નેતા અને એમપી એસ. વેંકટેશને પણ આ કાર્યવાહીની ટીકા કરતા કહ્યું કે સંશોધકો અને શિક્ષણવિદોના ઘરે રાત્રે જઈને પુરાવા વિના અટકાયત કરવી તે જેલના દરવાજા તોડવા કરતા પણ બદતર છે. માત્ર 5 કરતા ઓછા ફોલોઅર્સવાળા ફેક ઇન્સ્ટાગ્રામ પેજ મુદ્દે પોલીસની આ હરકત સામે સવાલો ઉઠાવીને આ મામલે ઊંડી તપાસ અને જવાબદારો સામે કડક કાનૂની પગલાં લેવાની માંગ કરવામાં આવી છે.
