યુક્રેનના ડ્નિપ્રો શહેરમાં ગુરુવારે એક મોટો હુમલો થયો હતો, જ્યાં રશિયન ડ્રોને ભીડભાડવાળા રેલવે પ્લેટફોર્મને નિશાન બનાવ્યું હતું. આ અચાનક થયેલા હુમલામાં ઓછામાં ઓછા 13 નિર્દોષ લોકોએ પોતાના પ્રાણ ગુમાવ્યા છે, જ્યારે અન્ય 5 લોકો ગંભીર રીતે ઘાયલ થયા છે. હુમલા સમયે પ્લેટફોર્મ પર મુસાફરોની ભારે અવરજવર હતી અને ડ્નિપ્રોથી નજીકના શહેર ઝાપોરિઝિયા જવા માટે એક પેસેન્જર ટ્રેન રવાના થવાની તૈયારીમાં જ હતી. જોકે, ખતરાનું એલર્ટ હોવા છતાં પ્લેટફોર્મ પર લોકો હાજર હોવાથી જાનહાનીનો આંકડો વધી ગયો હતો.
યુક્રેનની સ્ટેટ રેલવે કંપની ઉક્રેઝાલીઝનિટ્સ્યાના જણાવ્યા અનુસાર, દુશ્મન દેશ દ્વારા જેટ-પાવર્ડ ડ્રોન એટલે કે યુએવીથી આ હુમલો કરવામાં આવ્યો હતો. આ વિસ્ફોટક ડ્રોન સીધું પ્લેટફોર્મ પર જ પડ્યું હતું, જ્યાં ટ્રેન નંબર 866 (ડ્નિપ્રો-ઝાપોરિઝિયા) ઊભી હતી. આ ભયાનક વિસ્ફોટ બાદ ઘટનાસ્થળે ભારે અફરાતફરી મચી ગઈ હતી. ડ્નિપ્રોના મેયર બોરિસ ફિલાટોવે પણ સોશિયલ મીડિયા પર સ્થિતિ અત્યંત ગંભીર હોવાની પુષ્ટિ કરતા અનેક જાનહાની થયાનું જણાવ્યું હતું.
હુમલાની આ ગંભીર ઘટના બાદ તરત જ રાહત અને બચાવ કામગીરી શરૂ કરી દેવામાં આવી હતી. ઘટનાસ્થળે તાત્કાલિક રેસ્ક્યુ ટીમ, મેડિકલ સ્ટાફ અને લો એનફોર્સમેન્ટ ઓફિસર્સ એટલે કે સુરક્ષાકર્મીઓને દોડી જઈને ઘાયલોને હોસ્પિટલ ખસેડવાની અને મલ્ટીપલ કેસ સંભાળવાની કામગીરી હાથ ધરી હતી. આ પ્રકારના હુમલાઓ યુદ્ધના માહોલ વચ્ચે નાગરિકોની સુરક્ષા સામે મોટા સવાલો ખડા કરી રહ્યા છે, ત્યારે આગામી સમયમાં આ ક્ષેત્રમાં સુરક્ષા વ્યવસ્થા વધુ સઘન બનાવવામાં આવે તેવી શક્યતા છે.
