ભારતીય અવકાશ સંશોધન સંસ્થા ISRO આગામી 30 ઓક્ટોબરે રાત્રે 11:51 વાગ્યે તેનું મહત્વનું નેવિગેશન સેટેલાઇટ NVS-03 લોન્ચ કરવા માટે સંપૂર્ણપણે તૈયાર છે. આ મિશન આંધ્રપ્રદેશના શ્રીહરિકોટા સ્થિત સતીશ ધવન સ્પેસ સેન્ટરના સેકન્ડ લોન્ચ પેડ પરથી GSLV-F18 રોકેટ દ્વારા અંતરિક્ષમાં મોકલવામાં આવશે. ભારતની આ નેવિગેશન વિધિ એટલે કે Navigation with Indian Constellation (NavIC) સિસ્ટમને વધુ મજબૂત બનાવવા માટે આ મિશન અત્યંત નિર્ણાયક સાબિત થવાનું છે, જે ભારતની પોતાની સ્વદેશી સેટેલાઇટ નેવિગેશન સિસ્ટમને વિદેશી સિસ્ટમ પરની નિર્ભરતા ઘટાડવામાં મદદ કરશે.
આ મિશન ભારતના GSLV રોકેટની 20મી ફ્લાઇટ હશે, જે NavIC સિસ્ટમની સેવાઓને અવિરત ચાલુ રાખવા માટે ડિઝાઇન કરાઈ છે. આ સિસ્ટમ ભારત અને તેની સરહદોથી આશરે 1500 કિલોમીટર સુધીના વિસ્તારમાં Position, Navigation and Timing (PNT) સર્વિસ પૂરી પાડે છે, જેનો ઉપયોગ નાગરિકો તેમજ વ્યૂહાત્મક કાર્યો માટે થાય છે. ખાસ વાત એ છે કે NVS-03 સેટેલાઇટમાં અગાઉના L5 અને S સિગ્નલની સાથે નવો L1 સિગ્નલ પણ ઉમેરવામાં આવ્યો છે અને તેમાં વિદેશી ઘડિયાળોની સાથે સ્વદેશી એટોમિક ક્લોક પણ ફિટ કરવામાં આવી છે, જે ચોકસાઈમાં વધારો કરશે.
વર્તમાન સમયમાં NavIC સિસ્ટમ જૂના થઈ રહેલા સેટેલાઇટ્સ, એટોમિક ક્લોક ફેઈલ થવાની સમસ્યા અને અગાઉના NVS-02 મિશનમાં થયેલા સેટબેકને કારણે પૂરતી ક્ષમતાથી કામ કરી રહી નથી અને હાલ માત્ર 3 જ ઓપરેશનલ સેટેલાઇટ્સ બચ્યા છે, જ્યારે બેઝિક પોઝિશનિંગ માટે ઓછામાં ઓછા 4 સેટેલાઇટ્સની જરૂર પડે છે. જો કે, NVS-03 ના સફળ લોન્ચિંગ બાદ તેને યોગ્ય ઓર્બિટમાં સ્થાપિત કરવામાં આવશે અને આગામી સમયમાં NVS-04 અને NVS-05 જેવા મિશન પણ લાઇનઅપ કરવામાં આવ્યા છે, જેથી દેશની નેવિગેશન સિસ્ટમ સંપૂર્ણપણે રિલાયેબલ અને મજબૂત બની શકે.
