અમેરિકાની સરકારે દેશના પાવર ગ્રીડને સંભવિત સુરક્ષા જોખમોથી સુરક્ષિત રાખવા માટે મોટું પગલું ભરતા નેશનલ ઇમરજન્સીની જાહેરાત કરી છે. રાષ્ટ્રપતિ ટ્રમ્પ દ્વારા હસ્તાક્ષર કરવામાં આવેલા આ નવા એક્ઝિક્યુટિવ ઓર્ડરનો મુખ્ય ઉદ્દેશ્ય વિદેશી કંપનીઓ દ્વારા બનાવવામાં આવતા ઇલેક્ટ્રિસિટી ઇક્વિપમેન્ટ પર અંકુશ લાવવાનો છે, જે રાષ્ટ્રીય સુરક્ષા માટે ખતરો બની શકે છે. આનાથી પાવર જનરેશન, ટ્રાન્સમિશન અને ગ્રીડ ઓપરેશન્સમાં વપરાતા શંકાસ્પદ વિદેશી સાધનોની ખરીદી, આયાત અને ઇન્સ્ટોલેશન પર રોક લાગી શકશે. આ પગલાથી અમેરિકાની ક્રિટિકલ ઇન્ફ્રાસ્ટ્રક્ચરને સાયબર હુમલા અને સપ્લાય ચેઇનમાં અવરોધો સામે રક્ષણ મળશે.
આ ઇમરજન્સી હેઠળ એનર્જી ડિપાર્ટમેન્ટને એવા વિદેશી સાધનો અને ચોક્કસ વિદેશી સંસ્થાઓ પર નજર રાખવાની સત્તા મળી છે જે સુરક્ષા માટે જોખમી હોય. ખાસ કરીને AI ડેટા સેન્ટર્સ, એડવાન્સ્ડ મેન્યુફેક્ચરિંગ અને ડિફેન્સ પ્રોડક્શન ક્ષેત્રે વીજળીની વધતી માંગને કારણે ગ્રીડની સુરક્ષા વધુ મહત્વની બની ગઈ છે. તાજેતરમાં 12 ઓક્ટોબરના રોજ 13 સ્ટેટ્સમાં ઇમરજન્સી ઓર્ડર આપીને PJM ઇન્ટરકનેક્શનને ગ્રીડ સ્ટેબિલિટી જાળવવા માટે પાવર જનરેશન યુનિટ્સ ચાલુ રાખવાની મંજૂરી આપવામાં આવી હતી. આ ઓર્ડરમાં તમામ વિદેશી સાધનો પર સંપૂર્ણ પ્રતિબંધ નથી, પરંતુ જે સાધનો સુરક્ષા જોખમ ઊભું કરતા હોય તેમને હટાવવા કે અલગ કરવા માટે અધિકારીઓ કડક શરતો લાદી શકે છે.
સામાન્ય નાગરિકોની વાત કરીએ તો, આ નેશનલ ઇમરજન્સીના કારણે ગ્રાહકોના ઘર કે બિઝનેસમાં વીજ પુરવઠા પર કોઈ તાત્કાલિક અસર નહીં પડે અને વીજળી મળતી રહેશે. જોકે, પાવર યુટિલિટી કંપનીઓએ સુરક્ષાના ભાગરૂપે અમુક સાધનો બદલવા કે મોનિટર કરવા પડી શકે છે, જેનાથી સપ્લાય ચેઇનમાં થોડો બદલાવ આવશે. આ સાથે જ ટ્રાન્સફોર્મર્સ અને જનરેટર્સ જેવા સાધનો બનાવતી સ્થાનિક અમેરિકન કંપનીઓને મોટો વેગ મળશે અને ડોમેસ્ટિક મેન્યુફેક્ચરર્સ માટે નવી તકો ઊભી થશે. સરકારે વિદેશી સપ્લાયર્સ પરની નિર્ભરતા ઘટાડીને દેશના પાવર નેટવર્કને વધુ મજબૂત બનાવવાની દિશામાં આ નિર્ણાયક પગલું લીધું છે.
