જો તમને પુસ્તકો વાંચવાનો શોખ છે અને ઘરમાં શાંતિથી વાંચી શકાય તેવો એક ખૂણો બનાવવો છે, તો આ માટે આખો રૂમ હોવો બિલકુલ જરૂરી નથી. લિવિંગ રૂમનો ખાલી ખૂણો, બેડરૂમની બાજુનો ભાગ, બારી પાસેની જગ્યા કે દાદર નીચેનો વિસ્તાર આસાનીથી ઉપયોગમાં લઈ શકાય છે. આ માટે સૌથી પહેલાં ઘરમાં ઓછો અવાજ આવતો હોય તેવી શાંત જગ્યા પસંદ કરો. જો ઘરમાં પહેલેથી જ સ્ટડી ટેબલ કે હોમ ઓફિસ હોય, તો ત્યાં પુસ્તકો માટે શેલ્ફ અને બેઠકની યોગ્ય વ્યવસ્થા કરીને તેને સુંદર રીડિંગ કોર્નરમાં બદલી શકાય છે. નાની જગ્યામાં ભારે ફર્નિચર રાખવાને બદલે ઓછું ફર્નિચર રાખો, જેથી ખૂણો ભરચક ન લાગે.
ઓછી જગ્યામાં પુસ્તકો ગોઠવવા માટે ભારે બુકશેલ્ફને બદલે દીવાલ પર ફ્લોટિંગ શેલ્ફ લગાવો, જે જમીન પર જગ્યા રોક્યા વગર ઘણાં પુસ્તકો સાચવી શકે છે. આ બેઠક વ્યવસ્થા માટે ભારે સોફા કે મોટી ખુરશીને બદલે આરામદાયક નાની ખુરશી, બેન્ચ અથવા નરમ ગાલીચો વાપરી શકો છો. લાઈટિંગ માટે દિવસના સમયે કુદરતી પ્રકાશ મળી રહે તેવી બારી પાસેની જગ્યા ઉત્તમ છે, જ્યારે સાંજના સમયે આંખો પર ભાર ન પડે તે માટે ટેબલ લેમ્પ, ફ્લોર લેમ્પ કે વોલ લાઈટનો ઉપયોગ કરી શકાય છે. પુસ્તકોને વિષય, ભાષા, કદ કે રંગ પ્રમાણે વ્યવસ્થિત ગોઠવો અને બુકએન્ડનો ઉપયોગ કરો જેથી પુસ્તકો પડી ન જાય.
આ મિની લાઈબ્રેરીને વધુ આકર્ષક બનાવવા માટે તેમાં નાના ઇન્ડોર પ્લાન્ટ્સ, ફોટો ફ્રેમ અથવા મનપસંદ ડેકોરેટિવ વસ્તુઓ રાખી શકાય છે, પરંતુ જગ્યા ખુલ્લી દેખાય તે માટે વધારે સજાવટ કરવાનું ટાળવું જોઈએ. જો તમે આ ખૂણામાં લાંબા સમય સુધી વાંચતા હોવ, તો પુસ્તક, ચશ્માં કે કોફીનો કપ મૂકવા માટે નાનું સાઇડ ટેબલ કે દીવાલ પર નાની શેલ્ફ પણ ગોઠવી શકાય છે. આ સચોટ આયોજનથી ઓછી જગ્યા હોવા છતાં ઘરની અંદર જ એક શાનદાર અને લક્ઝુરિયસ લુક આપતી ડ્રીમ લાઈબ્રેરી તૈયાર થઈ જાય છે.
