દિવાળીનો તહેવાર નજીક આવતા જ સુરતમાં હીરા ઉદ્યોગમાં કામ કરતા લાખો રત્નકલાકારો પોતાના વતન જવા માટે ઉત્સુક હોય છે. આ સમયે ટ્રેનો અને બસોમાં ભારે ભીડ થતી હોય છે અને કન્ફર્મ ટિકિટ મેળવવી મુશ્કેલ બની જાય છે. આ જ સમસ્યાને ધ્યાનમાં રાખીને ભાવનગર ST વિભાગ દ્વારા રત્નકલાકારો માટે વિશેષ આયોજન કરવામાં આવ્યું છે, જેથી કોઈ પણ મુસાફરને વતન જવા માટે પરેશાની ન ભોગવવી પડે.
આ ખાસ વ્યવસ્થા અંતર્ગત આગામી 6 નવેમ્બરે સુરતથી ભાવનગર રૂટ પર 70 બસો અને 7 નવેમ્બરે વધુ 50 બસો દોડાવવામાં આવશે. આ તમામ વધારાની બસો માટે ST વિભાગ દ્વારા ઓનલાઈન બુકિંગ શરૂ કરી દેવામાં આવ્યું છે. આ ઉપરાંત મુસાફરોની સગવડ માટે ભાવનગર અને બોટાદ ખાતે ખાસ રિઝર્વેશન કાઉન્ટર પણ શરૂ કરવામાં આવ્યા છે, જેથી લોકોને લાઈનોમાં ઊભા રહેધા વગર સરળતાથી ટિકિટ મળી શકે.
ST તંત્ર દ્વારા આ વખતે મુસાફરો માટે એકદમ અનોખી અને ખાસ સુવિધા પણ જાહેર કરવામાં આવી છે. જો 50 મુસાફરોનું કોઈ ગ્રુપ એકસાથે બુકિંગ કરાવશે, તો ST વિભાગ દ્વારા તે બસને સીધી તેમના ગામ અથવા સોસાયટી સુધી પહોંચાડવાની ખાસ વ્યવસ્થા કરવામાં આવશે. તંત્રના આ પ્રજાલક્ષી નિર્ણયથી દિવાળીના પર્વ પર વતન જતા રત્નકલાકારોનો પ્રવાસ એકદમ આસાન અને આરામદાયક બની જશે.
