મહિલા પ્રીમિયર લીગ 2027 માટે યોજાયેલી ખેલાડીઓની હરાજીમાં ફ્રેન્ચાઇઝીઓએ ખેલાડીઓ પર ભારે ધનવર્ષા કરી હતી. ઓસ્ટ્રેલિયાની ખેલાડી સોફી મોલિનેક્સને પોતાની ટીમમાં સામેલ કરવા માટે યુપી વોરિયર્સ અને રોયલ ચેલેન્જર્સ બેંગલુરુ વચ્ચે જોરદાર જંગ જામ્યો હતો, પરંતુ અંતે યુપીની ટીમે બાજી મારીને તેને ₹1.10 કરોડની મસમોટી બોલી લગાવીને ખરીદી લીધી હતી. આ હરાજીમાં દેશ-વિદેશના કુલ 25 ખેલાડીઓ સોલ્ડ થયા હતા, જેમાં ફ્રેન્ચાઇઝીઓએ યુવા પ્રતિભાઓ તેમજ અનુભવી ખેલાડીઓ બંને પર ભરોસો મુક્યો હતો.
આ હરાજીમાં ભારતીય ખેલાડીઓનું પ્રદર્શન પણ શાનદાર રહ્યું હતું, જ્યાં કિરણ નવગિરેને દિલ્હી કેપિટલ્સે 75 લાખમાં ખરીદી હતી જ્યારે જી. કમલિની અને જેસ જોનાસેનને 40 લાખમાં કરારબદ્ધ કરવામાં આવ્યા હતા. આ ઉપરાંત ગ્રેસ હેરિસ, સ્નેહ રાણા, તેજલ હસાબનીસ, ઓર્લા પ્રેન્ડરગાસ્ટ, ક્લો ટ્રાયન અને સુષ્મા વર્મા જેવા ખેલાડીઓ ₹30 લાખની કિંમતમાં વિવિધ ટીમોમાં જોડાયા હતા. સૌથી મોટું આશ્ચર્ય 15 વર્ષની ઓલરાઉન્ડર ઉમા કાશવી રહી હતી, જેને દિલ્હી કેપિટલ્સે તેની બેસ પ્રાઈસ ₹10 લાખમાં ખરીદીને WPL ઇતિહાસની સૌથી નાની ઉંમરની ખેલાડી બનવાનું માન અપાવ્યું હતું.
આ હરાજી બાદ તમામ ટીમોનું સમીકરણ ઘણું મજબૂત બની ગયું છે અને વિદેશી સ્ટાર્સની સાથે સ્થાનિક ખેલાડીઓનું મિશ્રણ પણ જોવા મળી રહ્યું છે. હવે આગામી સીઝનમાં મેદાન પર આ તમામ ખેલાડીઓ પોતાના પ્રદર્શનથી ફ્રેન્ચાઇઝી દ્વારા આપવામાં આવેલી મોટી રકમ અને વિશ્વાસને કેટલો ન્યાય આપે છે, તે સમય જ બતાવશે. ચાહકો પણ આ રોમાંચક મેચો જોવા માટે અત્યારથી જ ઉત્સાહિત છે.
