આજકાલની ભાગદોડ ભરેલી લાઇફસ્ટાઇલમાં હૃદયની બિમારીઓ ઝડપથી વધી રહી છે ત્યારે હેલ્થને લઈને એક મોટા અને રાહતદાયક સમાચાર સામે આવ્યા છે. યુકેની પ્રખ્યાત બ્રિસ્ટલ યુનિવર્સિટીના તાજેતરના સંશોધનમાં એવો ખુલાસો થયો છે કે રોજ માત્ર થોડી મિનિટો ચાલવાથી આપણા હૃદય પર ચમત્કારિક અસર થાય છે. આ રિસર્ચ મુજબ નિયમિત કસરત માત્ર હૃદયના સ્નાયુઓને મજબૂત નથી કરતી, પરંતુ હૃદયને નિયંત્રિત કરતી નર્વસ સિસ્ટમના સમગ્ર વાયરિંગમાં પણ ક્રાંતિકારી બદલાવ લાવે છે, જે સ્વાસ્થ્ય માટે વરદાન સાબિત થઈ શકે છે.
વૈજ્ઞાનિકોએ પોતાના સંશોધનમાં શોધી કાઢ્યું છે કે માત્ર 10 અઠવાડિયાની મધ્યમ એરોબિક કસરત, જેવી કે રોજ ઝડપી ચાલવું, તે હૃદય પર અદ્ભુત પ્રભાવ પાડે છે. આ નિયમિત કસરતથી હૃદયની જમણી બાજુના ચેતાકોષોની સંખ્યામાં 4 ગણો મોટો વધારો થાય છે, જ્યારે તેની સાથોસાથ ડાબી બાજુના ચેતાકોષોનું કદ બમણું થઈ જાય છે. હૃદયની અંદર થતા આ શારીરિક અને ન્યુરોલોજીકલ બદલાવો હૃદયના પમ્પિંગ મિકેનિઝમને વધુ સચોટ અને પાવરફુલ બનાવે છે.
હૃદયનું આ અનોખું રિમોડેલિંગ કે રી-વાયરિંગ એરિથમિયા, એન્જેના અને તૂટેલા હૃદય સિન્ડ્રોમ જેવી ખતરનાક સમસ્યાઓની સચોટ સારવારમાં અત્યંત મદદરૂપ સાબિત થઈ શકે છે. ડોક્ટરો અને હેલ્થ નિષ્ણાતો પણ માને છે કે જો આપણે સ્વસ્થ હૃદય મેળવવું હોય, તો અઠવાડિયામાં કુલ 150 મિનિટ એટલે કે રોજ માત્ર 30 મિનિટ કસરત કે વોકિંગ અવશ્ય કરવું જોઈએ. આ નાની એવી ફિઝિકલ એક્ટિવિટી ભવિષ્યની મોટી હોસ્પિટલની મુલાકાતો અને મોંઘા ઓપરેશનથી આપણને બચાવી શકે છે.
