પાલનપુર શહેરનું અત્યાધુનિક ગણાતું બસપોર્ટ હાલ મુસાફરો અને વાહનચાલકો માટે માથાનો દુખાવો બની ગયું છે. બસપોર્ટની બહાર મુખ્ય માર્ગ પર ગેરકાયદે પાર્કિંગ અને અનિયંત્રિત દબાણોના કારણે રોજબરોજ ટ્રાફિક વ્યવસ્થા બિસ્માર હાલતમાં જોવા મળે છે. બસપોર્ટના અંદરના ભાગમાં યોગ્ય પાર્કિંગની સુવિધા ન હોવા ઉપરાંત ચારેબાજુ ગંદકીનું સામ્રાજ્ય ફેલાયેલું છે, જેના કારણે નાછૂટક મુસાફરો અને સ્થાનિકોએ પોતાના વાહનો મજબૂરીવશ મુખ્ય રસ્તા પર જ પાર્ક કરવા પડે છે. પરિણામે માર્ગ પર વાહનોની લાંબી કતારો લાગી જાય છે અને આખો રસ્તો બ્લોક થઈ જવાથી ગંભીર ટ્રાફિક સમસ્યા સર્જાય છે.
મુખ્ય રોડ પર બાઇક અને અન્ય વાહનો આડેધડ મુકી દેવાતા એસ.ટી. બસો, ઓટોરીક્ષા તેમજ અન્ય મોટા વાહનોની અવરજવર પણ અટકી પડે છે. અહીં કલાકો સુધી સર્જાતા ટ્રાફિકજામના કારણે હોસ્પિટલ જતા દર્દીઓ, એમ્બ્યુલન્સ અને દૂર-દૂરથી આવતા મુસાફરો ભારે હાલાકી ભોગવી રહ્યા છે. આટલી ગંભીર સમસ્યા હોવા છતાં ટ્રાફિક પોલીસ અને માર્ગ-મકાન વિભાગ આંખ આડા કાન કરી રહ્યા છે. નિયમિત પેટ્રોલિંગ કે દંડનીય કાર્યવાહીના અભાવે દબાણો દિવસેને દિવસે વધી રહ્યા છે, અને બસપોર્ટના નિર્માણ સાથે જોડાયેલા બિલ્ડર દ્વારા પાર્કિંગની શરતોનું પાલન ન કરાતું હોવા છતાં પાલનપુર નગરપાલિકા દ્વારા કોઈ જ કડક પગલાં લેવામાં આવ્યાં નથી.
સ્થાનિક નાગરિકો અને મુસાફરોની હવે સ્પષ્ટ માંગ છે કે વહીવટી તંત્ર પોતાની ઊંઘમાંથી જાગે. નગરપાલિકા, પોલીસ તંત્ર અને સંબંધિત વિભાગો દ્વારા તાકીદે સંયુક્ત ઝુંબેશ ચલાવીને રોડ પરના ગેરકાયદે દબાણો દૂર કરવામાં આવે, બસપોર્ટ સંકુલમાં સફાઈની યોગ્ય વ્યવસ્થા થાય અને નિયમોનું ઉલ્લંઘન કરનાર જવાબદાર બિલ્ડર સામે કડક કાનૂની કાર્યવાહી કરવામાં આવે જેથી સામાન્ય પ્રજાને આ ત્રાસમાંથી રાહત મળી શકે.
