બ્રાઝિલમાં રાજકીય ગરમાવો ચરમસીમાએ પહોંચ્યો છે કારણ કે પ્રમુખ લુઈસ ઇનાસિયો લુલા ડા સિલ્વા સરકાર તરફથી રાજકીય સતામણીના ડર વચ્ચે પૂર્વ રાષ્ટ્રપતિના પરિવારના સભ્યોએ ગુપ્ત રીતે દેશ છોડી દીધો છે. ફ્લેવિયો બોલસોનારો પોતાના પરિવાર સાથે ફ્લાઈટ લઈને અમેરિકાના મિયામી પહોંચ્યા છે. આ ઘટનાક્રમ બાદ બ્રાઝિલના રાજકારણમાં ભારે હલચલ મચી ગઈ છે અને આંતરરાષ્ટ્રીય સ્તરે પણ આ મામલો ચર્ચાના કેન્દ્રમાં આવ્યો છે.
આ સમગ્ર મામલે યુએસ પ્રમુખ ડોનાલ્ડ ટ્રમ્પે મોટું નિવેદન આપતા બોલસોનારોના અમેરિકા પ્રવેશ માટે પોતાના દરવાજા ખોલી દીધા છે. ટ્રમ્પે ફ્લેવિયો અને તેમના પરિવારને “ફાઈન પીપલ” એટલે કે સારા લોકો ગણાવ્યા છે. એટલું જ નહીં, ટ્રમ્પે બ્રાઝિલની તાજેતરની રાષ્ટ્રપતિની ચૂંટણી પર પણ સવાલો ઉઠાવ્યા છે. બ્રાઝિલમાં તાજેતરની ચૂંટણીના પરિણામો અને સત્તાપલટા બાદથી જ બોલસોનારો પરિવાર અને વર્તમાન સરકાર વચ્ચે તણાવ સતત વધતો જઈ રહ્યો હતો.
આ ગુપ્ત રીતે દેશ છોડીને ભાગવાના અને અમેરિકામાં શરણ લેવાના ઘટનાક્રમને કારણે બ્રાઝિલ અને અમેરિકા વચ્ચેના રાજકીય સમીકરણોમાં આગામી દિવસોમાં મોટો ફેરફાર જોવા મળી શકે છે. બ્રાઝિલની વર્તમાન સરકાર આ મામલે શું વલણ અપનાવે છે અને અમેરિકાનું આ સમર્થન બ્રાઝિલના આંતરિક રાજકારણને કઈ દિશામાં લઈ જાય છે તે જોવું રસપ્રદ રહેશે. હાલ તો આ ઘટનાને કારણે દક્ષિણ અમેરિકાથી લઈને વોશિંગ્ટન સુધી રાજકીય ગરમાવો વ્યાપી ગયો છે.
