આંધ્રપ્રદેશના દરિયાકાંઠે ત્રાટક્યા બાદ સાયક્લોન અર્નાબ હવે ધીમે-ધીમે નબળું પડી રહ્યું છે, પરંતુ તેની અસરો દેશના અનેક રાજ્યોમાં જોવા મળી રહી છે. હવામાન વિભાગના જણાવ્યા અનુસાર, આ ચક્રવાત 28 ઓક્ટોબરની સાંજે 1730 વાગ્યે આંધ્રપ્રદેશના દરિયાકાંઠે અને પશ્ચિમ-મધ્ય બંગાળની ખાડી પર કેન્દ્રિત હતું. છેલ્લા 6 કલાક દરમિયાન આ વાવાઝોડું ઉત્તર-ઉત્તરપશ્ચિમ દિશામાં 8 kmph ની ઝડપે આગળ વધ્યું છે અને તે વધુ નબળું પડીને ડીપ ડિપ્રેશનમાં ફેરવાઈ જવાની પૂરી સંભાવના છે. હવામાન વિભાગ આખી સિસ્ટમ પર સતત નજર રાખી રહ્યું છે અને સમય-સમય પર તેના અપડેટ્સ જાહેર કરવામાં આવી રહ્યા છે.
આ ચક્રવાતના પ્રભાવને કારણે દેશના અનેક ભાગોમાં હવામાનનો મિજાજ બદલાયો છે, જેમાં બિહાર, છત્તીસગઢ, પૂર્વ મધ્ય પ્રદેશ, પૂર્વ ઉત્તર પ્રદેશ, ઝારખંડ અને ઓડિશામાં અતિભારે વરસાદની આગાહી કરવામાં આવી છે. આ વિસ્તારોમાં ગાજવીજ સાથે 40 થી 60 kmph ની ઝડપે તોફાની પવનો ફૂંકાઈ શકે છે. આ ઉપરાંત અંદમાન અને નિકોબાર આઈલેન્ડ્સ, કોસ્ટલ આંધ્રપ્રદેશ, વેસ્ટ બંગાળ અને સિક્કીમમાં પણ ભારે વરસાદની ચેતવણી આપવામાં આવી છે. બીજી તરફ, ઉત્તર ભારતના રાજ્યો જેમ કે દિલ્હી, હરિયાણા, ચંદીગઢ અને પંજાબમાં વરસાદની સાથે-સાથે કરા પડવાની અને જોરદાર પવનો ફૂંકાવવાની સંભાવના વ્યક્ત કરવામાં આવી છે.
આ કુદરતી બદલાવને ધ્યાનમાં રાખીને તંત્ર દ્વારા નાગરિકોને સતર્ક રહેવાની સલાહ આપવામાં આવી છે. રાજસ્થાન, મહારાષ્ટ્ર, ઉત્તરાખંડ, હિમાચલ પ્રદેશ અને જમ્મુ-કાશ્મીર સહિતના અન્ય વિસ્તારોમાં પણ ગાજવીજ અને વીજળી પડવાની સાથે હળવાથી મધ્યમ પવનો ફૂંકાઈ શકે છે. આગામી 24 કલાક દરમિયાન આ સિસ્ટમ ઉત્તર-ઉત્તરપશ્ચિમ તરફ આગળ વધતી રહેશે અને ધીમે-ધીમે તેની તીવ્રતા ઘટતી જશે, છતાં લોકોને ખરાબ હવામાન સામે સાવચેત રહેવા અને સુરક્ષિત સ્થળોએ રહેવાની તાકીદ કરવામાં આવી છે.
