સ્પેનના ટોલેડો પ્રાંતમાં બુધવારે સવારે બનેલી એક અત્યંત કરૂણ ઘટનામાં બે હાઈ-સ્પીડ ટ્રેનો વચ્ચે થયેલી જોરદાર ટક્કરમાં 46 લોકોના મોત થયા છે અને અનેક લોકો ગંભીર રીતે ઘાયલ થયા છે. રાહત અને બચાવ કામગીરી હજુ પણ ચાલુ હોવાથી મૃતકો અને ઘાયલોનો આંકડો હજુ વધી શકે તેવી આશંકા વ્યક્ત કરવામાં આવી રહી છે. આ દુર્ઘટના મેડ્રિડ-સેવિલે રૂટ પર બની હતી, જ્યાં એક 'AVE' ટ્રેન અને એક 'Iryo' ટ્રેન સામસામે આવી ગઈ હતી અને બંને વચ્ચે ભયાનક અથડામણ થઈ હતી. ટક્કર એટલી ખતરનાક હતી કે ટ્રેનના અનેક ડબ્બા પાટા પરથી ઉતરીને બાજુની ખાડીમાં નીચે પડી ગયા હતા, જેને કારણે સ્થળ પર જ ભારે અફરાતફરી મચી ગઈ હતી.
આ અકસ્માત થયો ત્યારે 'Iryo' ટ્રેનમાં એક બાળક સહિત 147 મુસાફરો સવાર હતા, જ્યારે 'AVE' ટ્રેનમાં 397 લોકો હાજર હતા. આ ગંભીર દુર્ઘટના બાદ મેડ્રિડથી સ્યૂદાદ રિયલ અને અંડાલુસિયા તરફ જતી તમામ રેલવે સેવાઓ તાત્કાલિક અસરથી બંધ કરી દેવામાં આવી છે. સરકારના સૂત્રોના જણાવ્યા અનુસાર, મુખ્ય સિગ્નલિંગ સિસ્ટમ ખરાબ થયા બાદ 'Adif' ઓપરેટર દ્વારા થયેલી સંભવિત માનવીય ભૂલ આ દુર્ઘટનાનું મુખ્ય કારણ બની શકે છે. સામાન્ય રીતે આ સુરક્ષા પ્રણાલી સ્વચાલિત હોય છે, પરંતુ તે ફેલ થવાના કારણે કંટ્રોલને મેન્યુઅલ મોડ પર શિફ્ટ કરવામાં આવ્યો હતો અને તે જ સમયે ઓપરેટરથી મોટી ચૂક થતાં બંને ટ્રેનો એક જ ટ્રેક પર આવી પહોંચી હતી. ક્ષેત્રીય સરકારના પ્રવક્તાના જણાવ્યા મુજબ, તપાસકર્તાઓ એ બાબતની પણ તપાસ કરી રહ્યા છે કે ટક્કરના સમયે એક ટ્રેન ટ્રેક પર અચાનક કેમ ઊભી રહી ગઈ હતી.
જે રેલવે લાઇન પર આ કરૂણ દુર્ઘટના ઘટી છે ત્યાં 1980ના દાયકાથી જૂની 'LZB' સિગ્નલિંગ સિસ્ટમ કાર્યરત હતી. જોકે આ સમગ્ર રૂટનું તકનીકી આધુનિકીકરણનું કામ પૂરું થવાના આરે હતું, પરંતુ તે પહેલા જ આ ઘાતક ચૂક થઈ ગઈ અને મોટો ભોગ લેવાયો. આ દુર્ઘટનાને પગલે સ્પેનભરમાં શોકનું મોજુ ફરી વળ્યું છે અને રેલવે સુરક્ષા સામે ગંભીર સવાલો ઉભા થયા છે. તંત્ર દ્વારા હાલ બચાવ કામગીરીને પ્રાથમિકતા આપીને ઘાયલોને તાત્કાલિક હોસ્પિટલ ખસેડવામાં આવ્યા છે, જ્યારે આ ગંભીર બેદરકારી પાછળ જવાબદાર લોકો સામે કડક કાર્યવાહીના સંકેતો આપવામાં આવ્યા છે.
