અમેરિકામાં ડોનાલ્ડ ટ્રમ્પની નવી સરકારે કમાન સંભાળ્યા બાદ પહેલીવાર ક્વાડ દેશોના ટોચના નેતાઓની સમિટ મળવા જઈ રહી છે. આ મહત્ત્વની બેઠક મિડ-નવેમ્બરમાં મનિલા ખાતે યોજાનાર આસિયાન અને ઈસ્ટ એશિયા સમિટની સાઈડલાઈનમાં યોજાય તેવી પૂરી શક્યતા છે. રાષ્ટ્રપતિ ડોનાલ્ડ ટ્રમ્પની ફરીથી સત્તા પર વાપસી પછી ચારેય દેશોના નેતાઓ પહેલીવાર એક જ પ્લેટફોર્મ પર ભેગા થશે. આ સમિટમાં પીએમ નરેન્દ્ર મોદી ઉપરાંત અમેરિકા, જાપાન અને ઓસ્ટ્રેલિયાના વડાઓ પણ ભાગ લેશે.
મનિલામાં આગામી 15 થી 18 નવેમ્બર દરમિયાન આસિયાન અને ઈસ્ટ એશિયા સમિટનું આયોજન કરવામાં આવ્યું છે. આ ક્વાડ સમિટના એજન્ડાને આખરી ઓપ આપવા માટે તમામ દેશોના વિદેશ મંત્રીઓ આશરે આ શુક્રવાર અને શનિવારે એટલાન્ટા ખાતે મળી રહ્યા છે, જ્યાં જી20 ફોરેન મિનિસ્ટર્સ મીટિંગ ચાલી રહી છે. અગાઉ 2024માં બાઈડેન સરકાર દરમિયાન અમેરિકામાં છેલ્લી ક્વાડ સમિટ યોજાઈ હતી. આ વખતની બેઠકમાં ખાસ કરીને ક્રિટિકલ ટેક્નોલોજી, મહત્ત્વના મિનરલ્સ, સપ્લાય ચેઈન, મેરિટાઇમ સિક્યુરિટી અને ડિઝાસ્ટર મેનેજમેન્ટ જેવા મુદ્દાઓ પર ફોકસ રહેશે. આ સિવાય ક્વાડ એનર્જી બેંકની સ્થાપના કરવા અંગે પણ ચર્ચા થવાની પૂરી સંભાવના છે.
વર્તમાન સમયમાં ચાલી રહેલા યુદ્ધો અને ટ્રેડ રૂટ્સના દુરુપયોગને ધ્યાનમાં રાખીને જીવનજરૂરી ચીજવસ્તુઓની સપ્લાય ચેઈનને સુરક્ષિત કરવી એ આ બેઠકનો મુખ્ય એજન્ડા રહેશે. આ ક્વાડ સમિટ બાદ ભારત અને જાપાન વચ્ચે ટોક્યોમાં ફોરેન અને ડિફેન્સ મિનિસ્ટર્સના સ્તરની ચોથી ટુ પ્લસ ટુ મીટિંગ પણ યોજાવાની છે. નિષ્ણાતોના મતે આ બેઠકોથી વૈશ્વિક સ્તરે જીઓપોલિટિકલ સ્ટેબિલિટી જાળવવામાં ઘણી મદદ મળશે.
