ચેન્નઈમાં સોશિયલ મીડિયા પર વાયરલ થયેલી એક ચોંકાવનારી ઘટનામાં સરકારી બસની સીટ પર કોઈની હત્યા કરવાની જાહેરાત લખનાર 33 વર્ષીય આરોપી પોલીસના સળિયા પાછળ પહોંચી ગયો છે. વ્યાસડર્પી વિસ્તારના દામોદરન નગરનો રહેવાસી અને 10 જેટલા ગંભીર ગુનાઓમાં સંડોવાયેલો ઝાકીર હુસૈન નામનો હિસ્ટ્રીશીટર આ કારનામાનો માસ્ટરમાઇન્ડ નીકળ્યો છે. તેણે કોડુંગાઈયુર અને અન્ના સ્ક્વેર વચ્ચે દોડતી રૂટ નંબર 2B ની ઇલેક્ટ્રિક બસની પાછળની સીટ પર એક પેનથી ચોંકાવનારો મેસેજ લખ્યો હતો, જેણે થોડા જ સમયમાં સોશિયલ મીડિયા પર ભારે ચર્ચા જગાવી હતી અને પોલીસ તંત્રમાં દોડધામ મચાવી દીધી હતી.
બસની સીટ પર લખેલા આ વાંધાજનક મેસેજમાં “વ્યાસડર્પીમાં કોઈ રાઉડીની હત્યા કરવી છે? તો મારો સંપર્ક કરો” એવું લખીને સાથે એક મોબાઈલ નંબર અને ધારદાર તલવારનું ચિત્ર પણ દોરવામાં આવ્યું હતું. આ ફોટો સોશિયલ મીડિયા પર વાયરલ થતાં જ MKP નગર પોલીસ સ્ટેશનમાં ગુનો નોંધાયો અને તાત્કાલિક તપાસ શરૂ કરવામાં આવી હતી. પ્રાથમિક તપાસમાં આ નંબર વ્યાસડર્પીના જ વિક્ટી નામના નાના-મોટા ગુનાઓ સાથે સંકળાયેલા શખ્સનો હોવાનું સામે આવ્યું હતું. પોલીસને પહેલા તો એવું જ લાગ્યું કે વિક્ટીએ જ આ કારનામું કર્યું છે, પરંતુ ઝાકીર હુસૈન સાથેની જૂની અદાવતને કારણે પોલીસે ઊંડાણપૂર્વક તપાસ કરી અને બસના સીસીટીવી કેમેરા ચેક કર્યા તો અસલી ખેલ ખેલાડી પકડાઈ ગયો હતો.
પોલીસ પૂછપરછમાં આરોપી ઝાકીરે કબૂલાત કરી હતી કે તેણે નશાની હાલતમાં પોતાના દુશ્મન વિક્ટીને ફસાવવા માટે આ પ્લાન બનાવ્યો હતો, કારણ કે તેને શંકા હતી કે વિક્ટીએ તેનો ચોરાયેલો મોબાઈલ ફોન લઈ લીધો છે. સીસીટીવી ફૂટેજમાં ઝાકીર ખુદ સીટ પર કંઈક લખતો રંગેહાથ ઝડપાઈ ગયો હતો, જેના આધારે પોલીસે તેને ઝડપી લીધો હતો. આ મામલે પોલીસે કાયદેસરની કાર્યવાહી કરીને આરોપીને કોર્ટમાં રજૂ કર્યો હતો જ્યાંથી તેને જ્યુડિશિયલ કસ્ટડીમાં મોકલી આપવામાં આવ્યો છે.
