યુએન જનરલ એસેમ્બલીની બેઠક દરમિયાન અમેરિકા અને ક્યુબા વચ્ચે તણાવ ચરમસીમાએ પહોંચી ગયો હતો, જ્યાં દાયકાઓ જૂના અમેરિકન પ્રતિબંધોને લઈને ગરમાગરમ ચર્ચા ચાલી રહી હતી. ક્યુબાના વિદેશ મંત્રી બ્રુનો રોડ્રિગ્ઝ પરિલ્લા અને યુએસ એમ્બેસેડર માઈક વોલ્ટ્ઝ વચ્ચે સામસામે આક્ષેપો શરૂ થયા અને માહોલ એટલો ગરમાયો કે સત્રને થોડા સમય માટે સસ્પેન્ડ કરવું પડ્યું હતું. આ હાઈ-વોલ્ટેજ ડ્રામા દરમિયાન માહોલ વધુ ખરાબ થયો જ્યારે બંને દેશોના પ્રતિનિધિઓ વચ્ચે શાબ્દિક યુદ્ધની સાથે શારીરિક ઝપાઝપીની પણ નોબત આવી ગઈ હતી.
ઘટનાની વિગતો મુજબ, યુએનમાં ક્યુબાના ડિપ્લોમેટે અમેરિકન ડેલિગેશનના એક મેમ્બર સાથે ગેરવર્તણૂક કરી હતી. યુએસ એમ્બેસેડર માઈક વોલ્ટ્ઝે ગંભીર આક્ષેપ કર્યો હતો કે ક્યુબન ડિપ્લોમેન્ટે અમેરિકન ડેલિગેશનના એડવાઈઝર જે.પી. ફ્રાયરને ધક્કો માર્યો હતો અને હુમલો કરવાનો પ્રયાસ કર્યો હતો. આ ગરમાગરમ બોલાચાલી અને હાથાપાઈની ઘટના બાદ અમેરિકાએ તાત્કાલિક આક્રમક પગલાં લીધા હતા અને ક્યુબન ડિપ્લોમેટ રિચાર્ડ ટુર દે લા કોન્સેપ્સિયન વિરુદ્ધ એક્શન લેવામાં આવ્યા હતા.
ઘટનાની ગંભીરતાને જોતા અમેરિકાના સ્ટેટ સેક્રેટરી માર્કો રુબિઓએ તાત્કાલિક ક્યુબન ડિપ્લોમેટને દેશમાંથી બહારનો રસ્તો બતાવતી કાગળની કાર્યવાહી પૂરી કરી દીધી હતી. માર્કો રુબિઓએ સ્પષ્ટ શબ્દોમાં ‘He’s gone’ કહીને ક્યુબન ડિપ્લોમેટના દેશનિકાલની જાહેરાત કરી દીધી હતી. યુએન જેવા વૈશ્વિક મંચ પર રાજદ્વારી મર્યાદાઓ વટાવીને અમેરિકન સ્ટાફ પર હુમલો કરવાના આ કિસ્સાથી આંતરરાષ્ટ્રીય રાજકારણમાં મોટો ઉછાળો આવ્યો છે અને આગામી સમયમાં બંને દેશો વચ્ચેના સંબંધો વધુ બગડવાના એંધાણ વર્તાઈ રહ્યા છે.
