અરુનાચલ પ્રદેશના મંત્રી બોલો રાજાએ ભારત-ચીન બોર્ડર પર ચીની સેના સાથેના ફેસઓફ અંગેના ITBP ચીફ શત્રુજીત સિંહ કપૂરના નિવેદન સામે મોટો સવાલ ઉઠાવ્યો છે. મંગળવારે ઈટાનગર ખાતે પત્રકારો સાથે વાતચીતમાં મંત્રી બોલો રાજાએ કહ્યું કે, ડીજી સ્તરના વરિષ્ઠ અધિકારીએ એવું નિવેદન કેમ આપવું જોઈએ જેનાથી ભારત નબળો હોવાની છાપ ઊભી થાય? તેમણે સ્પષ્ટ શબ્દોમાં જણાવ્યું કે ભારત આજે ખૂબ જ મજબૂત છે અને દેશની ઇન્ટેલિજન્સ ક્ષમતા પણ ખૂબ આગળ વધી ચૂકી છે. મંત્રીએ તો ત્યાં સુધી કહી દીધું કે આ માટે પિક્ચર 'ધુરંધર' જરૂર જોવી જોઈએ, જેથી ખબર પડે કે ભારતની તાકાત કેટલી વધી ગઈ છે.
આ સમગ્ર વિવાદ ITBP ચીફ શત્રુજીત સિંહ કપૂરના તાજેતરના એક નિવેદન બાદ શરૂ થયો છે. ગત 22 ઓક્ટોબરે રાજસ્થાનના અલવર ખાતે ITBPના જવાનોને સંબોધતી વખતે કપૂરે અરુનાચલ બોર્ડર પર ચીન સાથેના ચાલુ સંઘર્ષોનો ઉલ્લેખ કર્યો હતો. તેમણે ચીનને ભારતનું સૌથી મોટું દુશ્મન ગણાવતા પરંપરાગત યુદ્ધ પદ્ધતિઓને બદલે આધુનિક હથિયારો અને ડ્રોન વોરફેર જેવા પડકારો સામે સજ્જ રહેવા પર ભાર મૂક્યો હતો. તેમના આ નિવેદન બાદ દેશમાં રાજકીય ગરમાવો આવ્યો હતો અને વિપક્ષી નેતાઓએ કેન્દ્ર સરકાર પાસે બોર્ડરની વાસ્તવિક સ્થિતિ પર સ્પષ્ટતા માંગી હતી, જ્યારે બીજી તરફ ITBP પણ પોતાની ઓપરેશનલ ક્ષમતાઓ વધારવા પર કામ કરી રહી છે.
આ મામલે વિદેશ મંત્રાલયે પણ સ્પષ્ટતા કરતા જણાવ્યું છે કે જ્યારે ચીની સેના પેટ્રોલિંગ પેટર્ન બદલે છે ત્યારે બોર્ડર પર ક્યારેક તણાવ ઊભો થાય છે, પરંતુ LAC પર ગેરસમજ ટાળવા માટે ડિપ્લોમેટિક અને મિલિટરી સ્તરે વાતચીત ચાલુ છે. મંત્રાલયે ભારપૂર્વક કહ્યું કે બોર્ડર વિસ્તારમાં શાંતિ જાળવવી એ દ્વિપક્ષીય સંબંધોના વિકાસ માટે ખૂબ જ જરૂરી છે. જો કે, મંત્રી બોલો રાજાના આ તાજા નિવેદને સુરક્ષા અધિકારીઓ અને રાજકારણીઓ વચ્ચે ચાલી રહેલી ચર્ચાને વધુ વેગ આપ્યો છે.
